47:382  restituit  eos  in  patris  manum,  ut  posthac  eius  auspiciis  ac  virtute  serventur.  Summa  igitur  est,  quum  discipulis  aufertur  carnis  Christi  conspectus,  nihil  eos  iacturae  facere,  quia  Deus  in  suam  tutelam  ipsos  recipit,  cuius  virtus  perpetua  est.  Modum  servandi  adscribit,  ut  sint  unum.  Nam  quos  servare  decrevit  coelestis  pater,  eos  in  sanctam  fidei  et  spiritus  unitatem  colligit.  Sed  quia  non  satis  est,  si  quovis  modo  inter  se  homines  conspirent,  additur  particula  sicuti  et  nos.  Tunc  igitur  demum  felix  erit  nostra  unitas,  si  Dei  patris  et  Christi  imaginem  referat,  quemadmodum  cera,  cui  impressus  est  annulus,  formam  ab  eo  accipit.  Caeterum,  quomodo  pater  et  Christus  unum  sint,  paulo  post  exponam.  12.  Dum  eram  cum  ipsis  in  mundo,  ego  servavi  eos  in  nomine  tuo.  Quos  dedisti  mihi  custodivi,  et  nemo  ex  illis  periit,  nisi  filius  perditionis,  ut  scriptura  impleretur.  13.  Nunc  autem  ad  te  venio,  et  haec  loquor  in  mundo,  ut  habeant  gaudium  meum  impletum  in  se  ipsis.  12.  Dum  eram  in  mundo.  Dicit  se  Christus  servasse  eos  patris  nomine,  quia  se  ministrum  duntaxat  statuit,  qui  nihil  nisi  Dei  virtute  gesserit  atque  auspiciis.  Significat  ergo  minime  esse  consentaneum  ut  nunc  pereant,  quasi  suo  discessu  exstincta  sit  .Dei  virtus  aut  emortua.  Sed  valde  hoc  absurdum  videtur,  quod  servandi  partes  Christus  Deo  resignat,  ac  si  confecto  vitae  cursu  desineret  suorum  esse  custos.  Solutio  in  promptu  est,  sermonem  hic  tantum  haberi  de  visibili  custodia,  quae  in  Christi  morte  finem  accepit.  Nam  sane  quamdiu  in  terra  versatus  est,  non  aliunde  virtutem  mutuari  necesse  habuit  qua  discipulos  servaret,  sed  totum  hoc  ad  personam  mediatoris  refertur,  qui  sub  forma  servi  ad  tempus  apparuit.  Iam  vero  discipulos  iubet,  ex  quo  destitui  externo  adminiculo  coeperint,  recta  in  coelum  sensus  suos  attollere.  Unde  colligimus,  Christum  hodie  non  minus  servare  fideles  quam  olim,  sed  diverso  modo,  quia  divina  in  eo  maiestas  palam  refulget.  Quos  dedisti  mihi.  Rursum  eodem  argumento  utitur,  minime  decere  ut  pater  unquam  abiiciat,  quos  filius  eius  mandato  usque  ad  finem  ministerii  sui  servavit:  ac  si  diceret:  Ego  quod  mihi  iniunctum  abs  te  erat,  fideliter  exsequutus  sum  ac  praestiti,  ne  quid  in  manu  mea  periret:  nunc  quando  tuum  depositum  recipis,  tuum  est  prospicere  ut  salvum  maneat.  Quod  Iudam  excipit,  non  caret  ratione.  Nam  etsi  non  erat  ex  electis  et  ex  germano  Dei  grege,  officii  tamen  dignitas  illam  speciem  praebebat.  Nec  sane  quisquam  aliter  de  eo  sensisset,  quamdiu  in  tam  eximio  ordine  stetit.  Est  igitur,  quod  ad  grammaticam  attinet,  impropria  exceptio:  verum  si  rem  expendimus,  Christum  ex