41:382  peine  en  trouvera-on  de  dix  l'un,  que  s'il  veut  prendre  sa  refection,  qu'il  prie  Dieu,  que  la  plus  grand'  part  se  viendront  mettre  a  table  comme  des  pourceaux,  si  tost  qu'ils  verront  la  viande  preste,  et  d'engloutir,  d'invoquer  Dieu,  il  n'en  est  point  de  question.  Apres,  seront-ils  bien  saoules?  ils  se  leveront  de  la  comme  des  bestes,  sans  regarder  qui  est  celuy  qui  les  ha  nourris  et  repeus:  sans  reconnoistre  qu'il  faut  que  Dieu  non  seulement  leur  donne  les  viandes,  mais  qu'il  les  face  profiter  pour  leur  nourriture.  Et  puis  se  leveront-ils  du  matin?  ils  penseront  a  leurs  trafiques,  a  tromper  l'un,  a  frauder  l'autre,  a  faire  quelque  meschante  entreprinse.  S'en  iront-ils  coucher  le  soir?  ils  entreront  au  lict  pour  s'y  endormir  incontinent,  cependant  Dieu  est  la  laisse.  Voiant  donc  cette  perversite,  qui  est  auiourd'hui  quasi  par  tout  le  monde,  cette  laschete  et  froidure,  d'autant  plus  devons-nous  bien  noter  cette  reigle,  qui  est  ici  monstree,  que  Daniel  combien  qu'il  priast  incessamment,  qu'il  eust  son  coeur  esleve  a  Dieu,  qu'il  observast  cette  reigle,  que  nostre  Seigneur  commande  en  l'escriture,  de  prier  Dieu  en  perseverance,  toutesfois  si  avoit-il  une  heure  certaine  de  le  prier  trois  fois  le  iour.  Or  il  est  dit  qu'en  priant  Dieu,  il  se  confessoit  devant  luy,  c'est  encores  un  article  que  nous  devons  bien  noter,  et  toutesfois  nous  le  toucherons  ici  en  brief,  d'autant  qu'en  l'oraison  que  nous  verrons  au  neufieme  chapitre,  il  en  sera  traicte  plus  amplement,  car  la  Daniel  recite  qu'il  ha  confesse  son  peche,  et  les  peches  de  son  peuple,  mais  encores  si  faut-il  bien  que  ce  passage  ici  soit  note  de  nous.  Or  il  est  dit  que  Daniel  se  confessoit  devant  Dieu,  car  le  sainct  Esprit  nous  donne  une  reigle  perpetuelle  et  generalle,  que  quand  nous  prions  Dieu,  il  faut  que  nous  facions  tousiours  confession  de  nos  peches.  Ne  pensons  point  avoir  aucun  acces  a  Dieu,  pour  luy  faire  oraison  qui  luy  soit  aggreable,  sinon  en  confessant  nos  peches.  Pourquoy?  premierement,  qui  sera  celuy  qui  se  pourra  vanter  d'une  telle  perfection,  qu'il  n'y  ait  rien  en  luy,  en  quoy  Dieu  le  reprenne  et  condamne?  il  se  pourra  bien  faire,  que  devant  les  hommes  nous  desguiserons  nos  vices,  mais  ne  seront-ils  point  conneus  de  Dieu  cependant?  Ainsi  donc  notons  que  quand  il  est  question,  que  l'homme  se  connoisse  tel  qu'il  est,  qu'il  faut  qu'il  demeure  confus,  comme  aussi  ceux  qui  ont  le  mieux  profite  en  la  crainte  de  Dieu,  ils  demeurent  confus  et  abismes,  en  connoissant  quelle  est  leur  nature,  il  est  vray  que  les  hipocrites  se  banderont  les  ieux,  et  cuideront  estre  tant  excellents  que  merveilles,  il  n'y  aura  que  vertu  en  eux,  il  n'y  aura  qu'innocence  et  sainctete,  mais  cependant  si  n'est-ce  pas  a  dire  qu'ils  en  soient  plus  a  estimer:  mais  au  contraire,  ils  ne  font  que  redoubler  leur  mal  quand  ils  le  couvrent  ainsi.  Tant  y  ha  qu'il  faut  que  tous