54:380  pour  servir  a  Dieu,  estoit  docteur,  et  avoit  charge  et  estat  en  l'Eglise.  Or  il  specifie  quel  estoit  cest  office-la,  disant  qu'il  est  Apostre  de  Iesus  Christ:  et  nous  scavons  que  Dieu  a  envoye  son  Fils  a  telle  condition  que  luy  seul  domine  par  dessus  nous.  Or  il  ne  converse  pas  ici  en  personne,  mais  il  a  choisi  ceux  qui  luy  a  pleu,  afin  d'anoncer  sa  parole,  et  de  representer  sa  personne  et  son  lieu.  Et  c'est  ce  qui  est  traite  plus  amplement  au  quatrieme  des  Ephesiens,  que  Iesus  Christ  estant  monte  au  ciel,  a  ordonne  en  son  Eglise  des  Apostres,  des  Evangelistes,  des  Pasteurs,  et  des  Docteurs,  qu'il  n'a  point  laisse  les  siens  despourveus,  mais  il  a  establi  une  si  bonne  police,  qu'il  ne  laisse  pas  de  nous  gouverner,  combien  qu'il  soit  absent  de  corps.  Nous  voyons  donc  maintenant  quelle  est  l'intention  de  sainct  Paul:  et  de  la  aussi  nous  pouvons  recueillir  qu'il  n'a  point  escrit  seulement  a  un  homme,  mais  que  ceste  doctrine  est  pour  tout  le  peuple.  Car  il  y  en  avoit  beaucoup  de  malins  (comme  desia  nous  avons  touche)  qui  ne  se  laissoyent  point  gouverner  par  Tite.  Pour  ceste  cause  sainct  Paul  se  vient  ici  mettre  comme  bouclier,  et  conferme  de  son  authorite  celuy  qui  estoit  ainsi  assailli.  Ce  n'est  point  donc  au  regard  de  Tite  qu'il  s'attribue  ces  titres  honorables:  car  cela  eust  este  superflu:  Tite  le  cognoissoit  comme  son  pere:  car  ce  n'est  pas  sans  cause  qu'il  l'appelle  ici  son  vray  fils:  et  il  scavoit  bien  aussi  de  qui  il  estoit  envoye.  Sainct  Paul  donc  n'avoit  nul  besoin  de  se  magnifier  envers  cest  homme  qui  desia  luy  portoit  honneur  tel  qu'il  estoit  requis  :  mais  pource  que  le  peuple  de  Crete,  ou  Tite  estoit  pour  lors,  ne  se  laissoit  pas  gouverner,  sainct  Paul  ne  vient  point  la  en  son  nom  prive,  mais  il  se  declare  estre  envoye  de  Dieu,  et  de  nostre  Seigneur  Iesus  Christ.  Mais  encores  pour  mieux  approuver  ce  qu'il  dit,  il  adiouste  que  c'est  selon  la  foy  commune  des  eleus.  Et  puis  il  declare  quelle  est  ceste  foy:  c'est  ascavoir  la  cognoissance  de  verite:  et  non  point  simplement,  mais  qui  est  selon  la  crainte  de  Dieu,  voire  en  l'esperance  de  la  vie  eternelle.  Or  ici  nous  voyons  qu'emporte  l'Apostolat  de  sainct  Paul:  ce  n'est  pas  une  dignite  oisive,  ce  n'est  pas  aussi  un  titre  volant  en  l'air,  mais  c'est  une  charge  qui  est  d'anoncer  la  parole  de  Dieu,  voire  tellement  que  le  monde  soit  edifie  a  bien,  et  que  le  salut  qui  nous  est  promis,  soit  publie,  et  que  tous  fideles  en  soyent  participans.  Voila  donc  en  somme  ce  que  nous  avons  a  retenir  de  ce  passage.  Mais  encores  il  sera  mieux  entendu  quand  nous  l'appliquerons  a  nostre  instruction.  Il  y  a  eu  de  tout  temps  deux  extremitez,  quant  est  de  recevoir  ceux  qui  anoncent  la  parole  de  Dieu,  ou  de  ies  reietter.  Car  beaucoup  ont  este  menez  par  ignorance,  ou  plustost  bestise,  qu'ils  n'ont  point  discerne  entre  le  bien  et  le  mal,  et  se  sont  contentez