52:380  afflictionum  acerbitatem  :  quod  scilicet  prosperum  semper  finem  habent.  *)  Si  quis  obiiciat,  non  semper  eundem  de  quo  gloriatur  successum  spectari:  verum  id  quidem  esse  fateor,  quod  ad  sensum  carnis.  Neque  enim  tandem  liberatus  fuit  Paulus  ipse.  Terum  quum  aliquoties  nos  Deus  liberat,  hoc  modo  testatur  se  nobis  adesse,  et  porro  adfuturum.  Nam  ex  praesentis  auxilii  sensu  vel  experimento  fiducia  nostra  in  futurum  extendere  se  debet.  Ergo  perinde  hoc  valet  ac  si  dixisset:  Expertus  es  Deum  mihi  nunquam  defuisse,  ita  non  est  quod  dubites  meo  exemplo  ipsum  sequi.  12.  Et  omnes.  Quia  persequutionum  suarum  meminerat,  nunc  quoque  addit,  nihil  sibi  accidisse  quod  non  maneat  omnes  pios.  Atque  hoc  dicit  partim  ut  se  comparent  fideles  ad  subeundam  hanc  sortem,  partim  ne  ob  persequutiones,  quas  sustinet  ab  impiis,  ipsum  boni  suspectum  habeant.  Quemadmodum  saepe  fit  ut  iniquam  fortunam  sequantur  iniqua  iudicia.  Nam  qui  minus  propitios  habet  homines,  mox  quoque  vulgo  iudicatur  Deo  exosus.  Quare  Paulus  se  filiis  Dei  aggregat,  in  hac  generali  sententia:  et  simul  filios  Dei  hortatur  ut  ferendis  persequutionibus  se  parent.  Nam  si  haec  lex  praescribitur  omnibus  qui  in  Christo  pie  volunt  vivere,  necesse  est  ut  Christo  renuntient,  qui  volunt  immunes  esse  a  persequutionibus.  Frustra  enim  Christum  disiungere  a  cruce  sua  conabimur:  quando  hoc  quasi  naturale  est,  ut  mundus  Christum  oderit  etiam  in  suis  membris.  Odii  vero  comes  est  crudelitas,  hinc  persequutiones.  Denique  sciamus  hac  conditione  nos  esse  Christianos,  ut  multis  aerumnis  et  certaminibus  variis  simus  obnoxii.  Sed  quaeritur  an  omnes  oporteat  esse  martyres.  Constat  enim  multos  fuisse  pios,  qui  nec  exilium  unquam,  nec  carcerem,  nec  fugam,  nec  aliud  persequutionis  genus  subierint.  Respondeo,  non  unam  esse  rationem  qua  Satan  persequitur  servos  Christi:  sed  tamen  omnino  necesse  est,  omnes  qualicunque  modo  habere  sibi  infestum  mundum,  ut  eorum  exerceatur  fides,  ac  probetur  constantia.  Satan  enim,  qui  perpetuus  est  Christi  hostis,  neminem  unquam  patietur  tota  vita  esse  quietum:  et  semper  erunt  improbi,  qui  nos  tanquam  spinae  pungant.  Quin  etiam  simulatque  se  profert  in  homine  fideli  Dei  zelus,  impiorum  omnium  rabiem  inflammat.  Atque  ut  non  habeant  gladium  exsertum,  suum  tamen  virus  evomunt  vel  fremendo,  vel  maledicendo,  vel  tumultuando,  vel  aliis  modis.  Ergo  utcunque  non  eosdem  omnes  sustineant  insultus,  nec  iisdem  immisceantur  proeliis,  communem  tamen  habent  militiam:  nec  omni  ex  parte  quieti  et  persequutionibus  immunes  erunt.  *)  Quamquam  non  idem  est  semper  successus.