58:38  ie  say  ce  que  ie  doi  faire:  et  cependant  ma  misericorde  aura  lieu,  et  ie  ferai  merci  a  celui  que  ie  ferai  merci:  c'est  a  dire,  Ie  ne  regarde  point  qui  en  est  digne,  car  il  n'y  en  a  pas  un  seul  :  mais  cependant  ie  ne  laisserai  pas  de  faire  merci  a  aucuns,  voire  a  ceux  que  i'auray  esleuz.  Voila  comme  Dieu  parle  precisement:  et  c'est  pour  rabatre  tout  ce  que  les  hommes  pourroient  alleguer,  pour  fermer  la  porte  a  toute  curiosite,  pour  couper  broche  a  toute  audace:  et  que  nous  l'adorions  simplement,  en  lui  laissant  ce  qu'il  se  reserve:  c'est  assavoir,  quand  il  sauve  c'est  de  sa  bonte  gratuite:  et  quand  il  condamne,  que  nous  ne  venions  point  iargonner  a  l'encontre  de  Dieu,  mais  que  nous  aions  la  bouche  close,  sinon  pour  le  glorifier.  Or  notons,  que  cela  a  este  dit  par  Moise,  quand  le  peuple  estoit  desia  multiplie,  et  que  Dieu  l'avoit  retire  d'Egipte.  Voila  une  eglise  qui  est  descendue  de  la  race  de  Iacob:  car  de  ceste  maison  sterile,  et  qui  estoit  comme  deserte,  Dieu  en  a  tire  une  multitude  si  grande  qu'on  void  bien  que  c'est  un  miracle  tout  notoire,  et  que  ceste  promesse  a  este  verifiee,  Que  m  la  semence  d'Abraham  seroit  comme  les  estoilles  du  ciel.  Cela  est-il  en  belle  monstre  quant  aux  hommes?  Dieu  dit,  De  ceste  multitude  ci,  i'en  retiendrai  ce  que  bon  me  semblera:  ie  ferai  merci  a  ceux  ausquels  ie  la  ferai,  et  qu'on  ne  s'enquiere  de  la  raison.  Il  est  vrai  que  la  raison  est  bien  en  Dieu  :  mais  ce  n'est  pas  a  dire  que  nous  la  comprenions,  ou  qu'il  nous  faille  fourrer  outre  nostre  mesure  en  ses  secrets.  Il  faut  donc  que  nous  sachions  quant  a  nous,  qu'il  n'y  a  nulle  raison:  mais  que  le  conseil  de  Dieu  nous  doit  estre  pour  toute  regle  de  iustice,  sagesse  et  equite.  Voila  donc  comme  l'exposition  de  saint  Paul  s'accorde  tresbien  a  ce  qui  est  ici  prononce:  c'est  assavoir,  qu'il  y  a  deux  peuples  au  ventre  de  Rebecca,  et  que  de  ses  entrailles  deux  nations  seront  divisees:  et  c'est  autant  comme  si  Dieu  avoit  testifie  que  il  y  aura  divorse  tel  que  cependant  la  lignee  de  Iacob  demeurera  benite.  Non  jpas  tous  sans  exception,  mais  ceux  qu'il  plaira  a  Dieu  de  retenir  a  soy,  comme  il  les  a  esleuz  avant  la  creation  du  monde.  Voila  donc  la  somme  de  ce  qui  est  ici  comprins.  Mais  avant  que  passer  outre,  notons  bien  ce  qui  a  este  dit:  c'est  assavoir,  que  le  principal  que  nous  avons  a  observer,  c'est  que  Dieu  veut  que  toute  la  louange  de  nostre  salut  lui  soit  attribuee  :  car  quelle  est  la  source  et  l'origine  de  l'eglise?  C'est  son  election.  Voila  ou  Moise  nous  ramene,  voire  selon  l'interpretation  de  saint  Paul:  et  aussi  le  texte  y  est  tout  evident.  Car  ici  il  n'est  point  question  (comme  i'ai  dit)  de  quelque  heritage  terrien,  ou  caduque:  c'est  du  salut  eternel  qu'Abraham  avoit  espere,  selon  qu'il  en  avoit  receu  la  promesse.  Or  voici  Iacob  qui  est  heritier,  et  pourquoi?  Est-ce  qu'il  se  soit  ainsi  mis  en  la  grace  de  Dieu,  ou  qu'il