49:38  tamen  recti  et  aequi  nequaquam  prorsus  carent.  Neque  enim  aliter  possent  inter  flagitium  virtutemque  discernere:  quorum  alterum  coercent  poenis,  alteram  commendant,  ac  suo  calculo  approbatam  praemiis  honorant.  Naturam  opposuit  legi  scriptae,  intelligens  scilicet  gentibus  naturalem  iustitiae  fulgorem  illucere,  qui  legis  vicem  suppleat,  qua  Iudaei  erudiuntur,  ut  sint  ipsae  sibi  lex.  15.  Quae  ostendunt  opus  legis  scriptum.  Hoc  est,  testificantur  esse  inscriptum  cordibus  suis  discrimen  et  iudicium,  quo  inter  aequum  et  iniquum,  honestum  et  turpe  distinguant.  Non  enim  intelligit,  insculptum  eorum  voluntati  ut  appetant  et  studiose  persequantur,  sed  quia  sic  veritatis  potentia  vincuntur  ut  non  possint  non  approbare.  Cur  enim  religiones  instituunt  nisi  quia  Deum  colendum  iudicant?  Cur  scortari  et  furari  pudet,  nisi  quia  utrumque  malum  censent?  Importune  ergo  ex  hoc  loco  potestas  voluntatis  nostrae  effertur:  ac  si  facultati  nostrae  subiectam  legis  observationem  diceret  Paulus  :  quum  de  implendae  legis  potestate  non  loquatur,  sed  de  notitia.  Nec  vero  cordis  nomen  pro  sede  affectuum,  sed  tantum  pro  intellectu  capitur,  ut  alibi:  Non  dedit  Dominus  tibi  cor  ad  intelligendum.  Item:  Stulti  homines  et  tardi  corde  ad  credendum.  Praeterea  nec  ex  eo  colligendum  est,  hominibus  inesse  plenam  legis  cognitionem,  sed  quaedam  duntaxat  iustitiae  semina  esse  indita  ipsorum  ingenio:  qualia  sunt  quod  religiones  instituunt  omnes  peraeque  gentes,  adulrerium  legibus  plectunt,  et  furtum,  et  homicidium:  bonam  fidem  in  commerciis  ac  contractibus  commendant.  Sic  enim  testantur  non  se  latere,  Deom  colendum  esse:  adulterium  et  furtum  et  homicidium  esse  mala:  probitatem  esse  laudabilem.  Nec  interest  qualem  fingant  Deum,  aut  quot  etiam  deos  fabricent:  satis  est  quod  Deum  esse  intelligunt,  et  illi  honorem  cultumque  deberi.  Non  refert  an  alienae  mulieris,  et  possessionis,  et  cuiusvis  rei  cupiditatem  permittant:  an  ad  iram  odiumque  conniveant.  Nam  quod  perpetrare  malum  esse  norunt,  neque  illis  fas  erit  concupiscere.  Attestante  conscientia  et  cogitationibus.  Non  poterat  fortius  eos  premere  quam  propriae  conscientiae  testimonio,  quae  est  instar  mille  testium.  Conscientia  benefactorum  se  sustentant  ac  consolantur  homines:  male  sibi  conscii,  intra  se  torquentur  ac  cruciantur.  Unde  illae  ethnicorum  voces:  amplissimum  theatrum  esse  bonam  conscientiam:  malam  vero  pessimum  carnificem,  ac  saevius  quibuslibet  furiis  impios  exagitare.  Est  igitur  naturalis  quaedam  legis  intelligentia,  quae  hoc  bonum  atque  expetibile  dictet,  illud  autem  detestandum.  Observa  autem  quam  erudite  describat  conscientiam,  quum  dicit  nobis  venire  in  mentem  rationes,  quibus  quod  recte  factum  est  defendamus:  rursum  quae  nos  flagitiorum  accusent  ac  redarguant.  Rationes  autem