45:38  ignobilis  eram  et  contempta,  id  non  obstitit  Deo,  quominus  dignatus  sit  ad  me  oculos  suos  convertere.  Quodsi  Mariae  humilitas  excellentiae  opponitur  (quemadmodum  et  res  ipsa  clamat,  et  ex  graeca  voce  liquet)  videmus,  ut  Maria  se  ipsam  exinaniens  Deum  unum  extollat.  Nec  vero  fictae  hoc  humilitatis  praeconium  fuit,  sed  simplex  et  ingenu^  eius,  quam  animo  insculptam  habebat,  persuasionis  confessio.  Nam  et  nullius  erat  coram  mundo  pretii,  et  ipsa  nihilo  pluris  se  aestimabat.  Ex  hoc  tempore  beatam.  Significat,  memorabile  sacculis  omnibus  fore  hoc  Dei  beneficium.  Quodsi  tam  insigne  est,  ut  passim  omnium  ore  praedicari  debeat,  ipsi  Mariae,  in  quam  collatum  fuit,  de  eo  silere  minime  fas  est.  Observa  autem,  Mariam  nihil  in  sua  felicitate  ponere,  nisi  quod  sibi  divinitus  datum  esse  agnoscit,  eiusque  gratiae  acceptum  refert.  Beata,  inquit,  censebor  per  omnes  aetates.  An  quia  sibi  propria  virtute  vel  industria  laudem  hanc  quaesierit?  quin  potius  solum  Dei  opus  commemorat.  Unde  perspicimus,  quantum  ab  ea  distent  Papistae,  qui  inanibus  suis  figmentis  eam  temere  ornantes  quidquid  accepit  bonorum  a  Deo  fere  pro  nihilo  habent.  Magnificos,  imo  plus  quam  superbos  titulos  affatim  congerunt,  quod  sit  regina  coeli,  stella  salutis,  porta  vitae,  dulcedo,  spes  et  salus.  Quin  etiam  eo  impudentiae  et  furoris  ipsos  proripuit  Satan,  ut  imperium  illi  in  Christum  traderent:  haec  enim  est  eorum  cantilena,  roga  patrem,  iube  natum.  Nihil  horum  a  Domino  profectum  esse  quum  liquido  constet,  omnia  uno  verbo  sancta  virgo  repudiat,  dum  totam  suam  gloriam  in  Dei  beneficiis  statuit.  Nam  si  hoc  uno  tantum  nomine  celebranda  est,  quod  Deus  magnifice  cum  ipsa  egit,  ficticiis  titulis,  qui  aliunde  proveniunt,  nullus  relinquitur  locus.  Adde  quod  nihil  illi  magis  probrosum  est  quam  filio  Dei  eripi  quod  suum  est,  ut  sacrilegis  eius  spoliis  ipsa  induatur.  Eant  nunc  papistae,  et  nos  in  Christi  matrem  iniurios  esse  clamitent,  quia  reiectis  hominum  mendaciis  tantum  Dei  beneficia  in  illa  praedicamus.  Atqui  quod  ei  maxime  honorificum  est,  nos  concedimus,  isti  vero  praeposteri  cultores  detrahunt.  Libenter  enim  eam  amplectimur  magistram,  eiusque  doctrinae  et  praeceptis  obtemperamus.  Certe  non  obscurum  est,  quid  hic  dicat:  quo  posthabito  et  velut  calcato,  fidem  eius  dictis  quantum  in  se  est  abrogant  Papistae,  Nos  vero  meminerimus,  communem  hic  in  laudandis  tum  angelis  tum  hominibus  praescribi  regulam,  ut  in  illis  celebretur  Dei  gratia:  sicuti  etiam  nihil  omnino  est  laudabile,  quod  non  inde  prodierit.  Quum  dicit,  Deum  qui  potens  est  fecisse  magnifica,  significat,  Deum  non  alieno  subsidio  fuisse  adiutum,  ut  sola  eius  potentia  emineat.  Iam  repetendum  est  quod  prius  dixit,  se  fuisse  respectam,  quamvis  abiecta  et  contemptibilis  foret.  Unde  sequitur,