2:38  [CO  2.38]  emergere  quem  maxime  exstinctum  cuperent,  deitatis  sensum.  Unde  colligimus  non  esse  doctrinam  quae  in  scholis  primum  discenda  sit,  sed  cuius  sibi  quisque  ab  utero  magister  est,  et  cuius  neminem  oblivisci  natura  ipsa  patitur,  quamvis  huc  multi  nervos  omnes  intendant.  Porro  si  ea  conditione  nati  sunt  omnes  ac  vivunt  ut  Deum  cognoscant,  Dei  autem  notitia,  nisi  huc  usque  processerit,  fluxa  est  ac  evanida:  eos  omnes  a  creationis  suae  lege  degenerare  palam  est  qui  non  ad  hunc  scopum  universas  suae  vitae  cogitationes  actionesque  destinant.  Quod  nec  philosophos  ipsos  latuit.  Non  enim  aliud  est  quod  voluit  Plato,  dum  saepius  docuit,  summum  animae  bonum  Dei  esse  similitudinem,  ubi  percepta  eius  cognitione  in  ipsum  tota  transformatur.  Proinde  scitissime  quoque  ille  apud  Plutarchum  Gryllus  ratiocinatur,  dum  homines  affirmat,  si  ab  eorum  vita  semel  absit  religio,  non  modo  brutis  pecudibus  nihil  excellere,  sed  multis  partibus  longe  esse  miseriores,  ut  qui,  tot  malorum  formis  obnoxii,  tumultuariam  et  irrequietam  vitam  perpetuo  trahant.  Unum  ergo  esse  Dei  cultum,  qui  superiores  ipsos  reddat,  per  quem  solum  ad  immortalitatem  aspiratur.  CAPUT  IV.  Eandem  notitiam  partim  inscitia,  partim  malitia  vel  suffocari  Vel  corrumpi.  [Inst  1.4.1.]  Sicut  autem  omnibus  inditum  esse  divinitus  religionis  semen  experientia  testatur,  ita  vix  centesimus  quisque  reperitur  qui  conceptum  in  suo  corde  foveat,  nullus  autem  in  quo  maturescat:  tantum  abest  ut  fructus  appareat  suo  tempore.  Porro  sive  alii  evanescant  in  suis  superstitionibus,  sive  alii  data  opera  malitiose  a  Deo  desciscant,  omnes  tamen  degenerant  a  vera  eius  notitia.  Ita  fit  ut  nulla  in  mundo  recta  maneat  pietas.  Quod  autem  errore  aliquos  in  superstitionem  labi  dixi,  non  ita  accipio  quasi  sua  eos  simplicitas  a  crimine  liberet:  quia  caecitas,  qua  laborant,  semper  fere  et  superba  vanitate  et  contumacia  implicita  est.  Vanitas,  et  quidem  superbiae  coniuncta,  in  eo  deprehenditur  quod  neque  miseri  homines  in  Deo  quaerendo  supra  se  ipsos,  ut  par  erat,  conscendunt,  sed  pro  carnalis  sui  stuporis  modo  ipsum  metiuntur;  et  neglecta  solida  investigatione  ad  vanas  speculationes  curiose  transvolant.  Itaque  non  apprehendunt  qualem  se  offert:  sed  qualem  pro  sua  temeritate  fabricati  sunt,  imaginantur.  Quo  gurgite  aperto,  quaquaversum  pedem  moveant,  in  exitium  praecipites  semper  ruere  necesse  est.  Quidquid  enim