54:378  et  puis,  que  nostre  vie  soit  reiglee  comme  il  appartient,  que  nous  monstrions  par  effect  que  nostre  heritage  est  au  ciel,  et  qu'il  nous  faut  passer  par  ce  monde  sans  nous  y  arrester.  Voila  donc  l'intention  de  sainct  Paul  en  ceste  Epistre.  Or  regardons  si  de  nostre  temps  telles  remonstrances  ne  doyvent  pas  avoir  lieu,  et  si  elles  ne  nous  sont  pas  plus  qu'utiles.  Car  qui  voudroit  croire  beaucoup  de  gens,  quels  prescheurs  y  auroitil  auiourd'huy?  Car  voici  l'astuce  de  Satan,  d'introduire  gens  qui  ne  valent  rien,  afin  que  la  parole  de  Dieu  soit  en  mespris  et  opprobre.  Et  il  y  en  a  beaucoup  qui  ne  demandent  sinon  d'avancer  pour  Pasteurs  et  ministres  de  la  parole,  gens  ou  de  vie  dissolue,  ou  qui  n'ont  nul  zele,  ou  des  bavars,  et  mesmes  des  contempteurs  de  Dieu,  qui  seront  plustost  supposts  de  taverne  qu'autrement.  Et  pourquoy?  Car  ils  voyent  bien  que  tels  prescheurs  sont  comme  bridez,  et  que  quand  ils  parlent  on  ne  s'en  fait  que  mocquer,  et  que  mesmes  ils  auront  la  bouche  close,  qu'on  leur  fera  honte  du  premier  coup  :  et  qui  plus  est,  on  les  fera  passer  comme  des  singes  par  dessus  le  baston:  car  on  leur  reprochera  incontinent,  Et  qui  es-tu?  On  te  fait  une  grand'  grace  de  te  laisser  au  lieu  ou  tu  es:  car  tu  n'es  pas  digne  d'estre  un  porchier  ou  un  vachier,  et  tu  es  au  lieu  de  Pasteur.  Voila  donc  comme  beaucoup  de  malins  voudroyent  avoir  des  prescheurs  a  leur  poste:  on  le  voit,  et  on  l'a  veu:  et  pleust  a  Dieu  que  les  exemples  n'en  fussent  pas  si  communs.  Et  d'autant  plus  avons-nous  besoin  d'escouter  ce  qui  nous  est  ici  remonstre  par  sainct  Paul,  afin  que  nous  ayons  gens  qui  soyent  propres  pour  enseigner,  et  qui  s'acquittent  fidelement  de  leur  devoir:  et  quand  ils  auront  presche  comme  il  appartient,  que  leur  vie  responde,  et  qu'elle  soit  pour  ratifier  la  doctrine  qu'ils  portent,  et  luy  donner  approbation.  Et  d'autre  coste,  d'autant  que  nous  voyons  auiourd'huy  les  aureilles  de  beaucoup  de  gens  si  delicates,  que  si  tost  qu'on  gratte  leurs  rongnes,  c'est  a  se  tempester,  et  voudroyent  avoir  change  tous  les  coups  quand  on  ne  presche  point  a  leur  appetit,  qu'a  grand'  peine  de  cent  l'un  voudra-il  du  tout  se  ranger  paisiblement  a  la  bonne  doctrine,  et  ceux  qui  pro-