41:378  qu'ils  voudront  entreprendre,  sinon  que  l'honneur  de  Dieu  aille  devant,  et  qu'ils  tendent  a  ce  but  la,  que  Dieu  soit  honore,  sachant  que  le  reste  viendra  apres.  Or  maintenant  il  nous  faut  noter  ce  qui  est  ici  declare  de  la  preud'hommie  et  integrite  de  Daniel.  En  premier  lieu  il  est  dit,  qu'il  est  espie  des  plus  grands  du  Royaume,  et  que  tous  cerchoient  occasion  de  l'accuser.  En  cela  nous  voions  (mesmes  selon  le  monde)  que  ce  n'est  pas  le  meilleur  d'estre  en  estat  bien  haut,  et  abonder  en  richesses,  et  de  fait,  Daniel  ne  s'estoit  point  ingere  de  soymesmes,  et  n'avoit  point  ce  gouvernement  ici,  mais  Dieu  l'y  apele:  cependant,  s'il  estoit  cache  en  quelque  anglet  a  son  prive,  il  seroit  mieux  pour  vivre  paisiblement,  que  d'estre  la  en  cet  estat  ou  il  est,  a  endurer  beaucoup  de  peine  et  de  travail,  car  encores  qu'il  chemine  en  pure  conscience,  qu'il  aille  le  plus  rondement  en  son  estat,  qu'il  luy  est  possible,  si  est-ee  qu'on  trouve  occasion  de  mesdire  de  luy.  Or  la  dessus  il  nous  faut  noter,  que  le  sainct  Esprit  nous  ha  voulu  proposer  cet  exemple,  pour  nous  confermer,  quand  nous  serons  appeles  en  quelque  estat,  que  nous  aions  ce  propos  ferme  de  servir  a  Dieu,  et  cheminer  en  pure  conscience,  voire,  quelque  ingratitude  qu'il  y  ait  du  coste  des  hommes.  Il  faut  (di-ie)  que  chacun  ait  ceci  persuade  en  soy,  de  servir  a  Dieu,  de  cheminer  tellement  qu'il  puisse  une  fois  rendre  bon  compte  de  sa  vie,  quand  il  viendra  devant  ce  grand  et  souverain  Iuge.  Voire,  mais  que  profitons-nous  quand  nous  aurons  fait  du  mieux  qu'il  nous  sera  possible?  Les  hommes  ne  laisseront  pas  d'estre  meschans,  l'un  cerchera  dequoy  nous  calomnier,  l'autre  ira  semer  quelque  mensonge,  voila  comme  les  gens  de  bien  seront  brocardes:  et  ce  qui  est  ici  recite  de  Daniel,  nous  l'experimentons  tous  les  iours.  Il  n'est  ici  question  que  d'un  seul  homme,  mais  en  sa  personne  l'Esprit  de  Dieu  nous  ha  voulu  proposer  ce  que  nous  sentons  en  toute  nostre  vie.  Or  quand  il  y  auroit  la  plus  grande  malice  du  coste  des  hommes,  qu'on  scauroit  penser,  qu'ils  ne  demanderoient  qu'a  nous  mal  faire,  quand  ils  auront  receu  du  bien  de  nous,  si  ne  faut  il  point  que  nous  demourions  la.  Nostre  Seigneur  nous  declare,  que  ceux  sont  enfans  de  Dieu,  qui  rendent  le  bien  pour  le  mal.  Or  si  nous  faisons  seulement  du  bien  a  ceux  qui  nous  en  scauront  bon  gre,  et  qui  le  connoistront,  et  que  cependant  nous  laissions  la  les  autres,  que  nous  perdions  courage  de  leur  bien  faire,  ie  vous  prie,  avons  nous  quelque  regard  a  Dieu?  Si  donc  nous  voulons  servir  a  Dieu,  et  estre  advoues  de  luy,  il  faut  que  nous  aions  cette  consideration,  qu'encores  que  les  hommes  nous  rendent  le  mal  pour  le  bien,  qu'apres  que  nous  aurons  fait  du  mieux  qu'il  nous  sera  possible,  ils  ne  laissent  point  de  nous  vilipender  et  calomnier,  que  toutesfois  nous  ne  laissions  point  de