6:376  sibi  placet,  ut  non  satis  habeat  suam  insulsitatem  semel  prodidisse.  Huc  autem  spectat,  ne  eum  sine  ratione  maledicere  putes,  quidquid  sonent  verba  prophetae,  ut  tamen  opinio  sua  valeat:  quoniam  ecclesiae  autoritate  nitatur.  Aliquando  tamen  ad  rem  accedit.  Sicut  ante,  inquit,  nulla  auxilii  sui  facta  mentione,  totam  perfectionis  summam  potestatis  nostrae  fecerat,  quum  diceret:  Proiicite  a  vobis  iniquitates  vestras;  convertimini  ad  me;  facite  vobis  cor  novum  et  spiritum  novum:  ita  hic  eandem  uni  Deo  tribuit,  praeterita  nostra  facultate.  Ergo  utrumque  locum  iubet  coniungi,  ut  habeatur  illa,  de  qua  disseruit,  liberi  arbitrii  et  gratiae  coniugatio.  Quasi  vero  illi  permittam,  ex  praeceptis  colligere,  quanta  aut  qualis  sit  hominum  ad  obediendum  facultas.  Hunc  iubendo  legis  effectum  esse  ex  Paulo  scimus,  ut  occidat  (2  Cor.  3,  6).  Our?  nisi  quia  non  aliud  potest,  quam  hominem  transgressioni  subiicere?  Scimus  et  hoc  esse  eius  officium,  ut  hominem,  miseriae  suae  agnitione  perculsum,  confugere  ad  gratiam  doceat  (Gal.  3,  24).  Ergo  ab  externa  legis  praedicatione  recedendum  est,  ut  ad  spiritualem  eius  inscriptionem,  de  qua  loquitur  Ieremias  (31,  33),  veniamus.  Illic  enim  Dominus  foedus  se  facturum  promittit,  non  quale  ante  pepigerat,  quia  irritum  factum  fuerat  defectione  populi,  sed  foedus  novum,  quo  legem  inscribat  populi  sui  cordibus,  et  visceribus  insculpat.  Vides  causam,  cur  foedus  illud  quod  externa  praedicatione  constabat,  abrogetur:  quia  scilicet  violatum  fuerit  ab  hominibus.  Vides  et  novi  paciscendi  necessitatem  :  quia  scilicet  non  aliter  ratum  sit  futurum,  donec  spiritu  Dei  inscriptum  cordibus  fuerit.  Huius  efficaciae  si  vel  minimum  gustum  haberet  Pighius  :  aut  si  impotentiae  saltem  suae  conscientia  tangeretur,  non  amplius  obloqueretur,  in  hominum  statui  potestate  quod  illis  praecipitur.  [pag.  200]  Atque  hinc  etiam  patet,  quam  frivola  sit  et  nugatoria  eius  ratiocinatio.  Si  ex  promissionibus  inferamus,  solius  Dei  opus  esse  conversionem,  quia  se  solum  eius  autorem  illic  commemoret,  pari  ratione  evicturum  ex  praeceptis  Pelagium,  posse  nos  omnia,  Dei  gratia  nihil  adiutos:  quoniam  illic  a  nobis,  sine  mentione  gratiae,  perfecta  iustitia  exigatur.  Quasi  vero  ideo  dentur  praecepta,  ut  quod  deest  gratiae,  virium  nostrarum  subsidio  expleatur:  et  non  potius,  ut  propriae  impotentiae  convictos,  ad  gratiam  manu  ducant.  Alia  est  promissionum  ratio:  Dabo,  inquit  Dominus,  mentem,  ut  quod  rectum  est  videatis  et  eligatis;  dabo  cor  carneum,  ut  obediatis;  faciam  ut  ambuletis  in  lege  mea.  Non  suspendit  a  nobis  eorum  complementum,  quae  pollicetur,  sed  simpliciter  in  se  uno  locat.  Iubendo  autem,  non  facultatem  aut  novam  nobis  confert,  aut  quam  habemus  praedicat,  sed  nihil  omnino  nos  posse  nobis  ostendit,  ut  quo  penes  nos  deficimur,  aliunde  quaerere  discamus.  Valeat  ergo  fictitium  illud  Pighii