52:376  ullis  difficultatibus  vel  cedere,  vel  terreri  :  sed  potius  ad  resistendum  animos  colligere.  Sub  extremis  diebus  comprehendit  universum  christianae  ecclesiae  statum.  Neque  vero  aetatem  suam  cum  nostra  comparat,  sed  potius  qualis  futura  sit  regni  Christi  conditio,  docet.  Multi  enim  imaginabantur  beatam  nescio  quam  pacem,  et  immunem  omni  molestia.  Breviter,  intelligit  non  ita  bene  etiam  sub  evangelio  res  fore  compositas,  ut  profligatis  omnibus  vitiis  floreant  omne  genus  virtutes.  Quare  pastores  ecclesiae  christianae  non  minus  habituros  negotii  cum  improbis  et  sceleratis  hominibus,  quam  olim  habuerint  prophetae  et  pii  sacerdotes.  Unde  sequitur,  non  esse  otiandi  tempus.  2.  Erunt  homines.  Notandum  in  quo  asperitatem  vel  duritiem  temporum  constituat:  non  in  bello  scilicet,  nec  fame,  nec  morbis,  nec  aliis  calamitatibus  vel  incommodis,  quae  corpori  accidunt:  sed  in  malis  et  pravis  hominum  moribus.  Et  sane  piis  hominibus  Deumque  vere  timentibus  nihil  acerbius  est  quam  cernere  tales  morum  corruptelas.  Sicuti  enim  nihil  illis  prius  est  Dei  gloria:  ita  eius  contumelia  vel  contemptu  ipsos  maxime  cruciari  par  est.  Secundo,  notandum  de  quibus  loquatur.  Neque  enim  externos  hostes,  qui  ex  professo  Christi  nomen  oppugnant,  sed  domesticos  perstringit,  qui  censeri  volunt  inter  ecclesiae  membra.  Nam  eousque  suam  ecclesia^  exercere  vult  Deus,  ut  intus  tales  pestes  in  sinu  suo  gerat,  etiamsi  eas  fovere  horreat.  Ergo  si  hodie  nobis  plerique  sunt  permisti  quos  merito  exsecramur:  discamus  patienter  gemere  sub  isto  onere,  quando  hanc  christianae  ecclesiae  sortem  audimus.  Porro  mirum  est  posse  eos,  quorum  tot  ac  tanta  probra  commemorat  Paulus,  pietatis  speciem  retinere  eiusdem  testimonio.  Sed  quotidiana  experientia  facit  ne  sit  hoc  tam  mirum.  Nam  incredibilis  est  hypocritarum  protervia  et  improbitas:  ut  etiam  in  crassissimis  vitiis  excusantis  sint  plusquam  impudentes:  postquam  semel  Dei  nomen  falso  obtendere  didicerunt.  Quot  probris  olim  scatebat  Pharisaeorum  vita?  Et  tamen,  quasi  essent  puri  ab  omni  nota,  eximiae  sanctitatis  opinione  pollebant.  Hodie  quoque  quum  tanta  sit  spurcities  in  clero  papali,  quae  vel  suo  foetore  totum  mundum  inficit  :  non  desinunt  tamen  cum  sua  nequitia  titulos  iuraque  omnia  sanctorum  fastuose  sibi  arrogare.  Quod  ergo  dicit  Paulus  hypocritas,  etiam  dum  laborant  crassissimis  vitiis,  sub  pietatis  larva  nihilominus  fallere,  non  debet  videri  insolens  quando  exempla  sunt  ante  oculos.  Et  sane  dignus  est  mundus  cui  ita  scelesti  nebulones  illudant:  quando  veram  sanctitatem  vel  contemnit,  vel  ferre  non  potest.  Deinde  eiusmodi  vitia  enumerat  Paulus,  quae  non  protinus  apparent:  imo  quae  fictam  sanctitatem  ut  plurimum  comitantur.  Quis  enim  hypocrita  non  superbus?  non  amans  sui?  non  aliorum  contemptor?