8:375  375  QUATKE  SERMONS.  376  et  policee,  ou  la  parolle  de  Dieu  se  presche,  et  ou  les  sacremens  s'administrent  comme  il  appartient:  attendu  que  ce  sont  les  moyens  par  lesquels  les  enfans  de  Dieu  se  peuvent  confermer  en  la  foy,  et  [f.  3]  sont  incitez  a  vivre  et  mourir  en  l'obeissance  de  luy.  Or  il  m'a  semble  que  cest  argument  estoit  auiourd'huy  bien  necessaire,  pource  qu'il  y  a  beaucoup  de  Chrestiens  imaginatifs  qui  se  mocquent  de  ceulx  qui  prennent  peine  de  venir  en  pais  estrange  et  loingtain  pour  iouir  d'une  telle  liberte.  Mais  pour  ce  que  plusieurs  sont  retenus  et  empeschez  de  poursuyvre  ce  bien  que  Dieu  estime  tant,  pour  le  trop  grand  regard  qu'ils  ont  a  leur  aise  et  commoditez:  ou  bien  pour  la  crainte  et  doubte  qu'ils  ont  que  rien  leur  defaille:  et  les  autres  sont  si  delicas,  que  si  tout  ne  leur  vient  a  souhait,  ils  se  plaignent  et  murmurent,  ou  mesmes  se  desbauchent:  i'ay  adiouste  un  quatrieme  sermon  pour  remonstrer  aux  Chrestiens  qu'ils  doibvent  estre  munis  contre  tous  scandales,  et  porter  patiemment  toutes  fascheries  qui  leur  pourront  advenir,  moyennant  que  Dieu  leur  face  ceste  grace  de  les  entretenir  en  sa  maison.  Ainsi  la  somme  du  quatrieme  sermon  est,  quand  nous  avons  le  privilege  d'ouir  la  parolle  de  Dieu  purement  preschee,  d'invoquer  son  nom  et  user  des  sacremens,  que  cela  est  bien  pour  recompenser  tous  les  ennuis,  troubles  et  molestes  que  satan  pourra  susciter  contre  nous.  I'ay  mis  en  la  fin  une  briefve  exposition  du  Pseaume  octante  septieme,  laquelle  me  semble  venir  a  propos;  car  la,  il  est  traicte  de  la  restauration  de  l'Eglise  de  Dieu.  Or  nous  en  voyons  auiourd'huy  plusieurs  qui  se  descouragent,  la  voyans  ainsi  desolee  qu'elle  est,  comme  si  elle  debvoit  du  tout  perir  bientost.  Telles  gens,  et  en  general  tous  fideles,  trouveront  ici  dequoy  se  consoler,  voyans  l'esperance  que  Dieu  donne  de  remettre  au  dessus  son  Eglise  apres  avoir  este  abbatue  pour  un  temps,  et  la  faire  prosperer  et  florir,  apres  qu'elle  aura  este  miserable  selon  le  monde.  Ie  prie  nostre  bon  Dieu  que  ie  n'aye  point  travaille  en  vain,  mais  que  vous  soyez  edifiez  par  mon  labeur,  selon  que  ie  le  desire.  De  Geneve,  ce  vingtieme  de  Septembre  M.  D.  LII.