6:374  videas,  caecutire  te  puta.  Postea  tamen  ex  integro  solitam  confidentiam  resumit:  facturumque  se  recipit,  ut  omnes  videant,  nihil  in  meis  rationibus  firmitatis  esse.  Caeterum,  quoniam  multis  retro  saeculis  opinionem  hanc  receptam  vulgo  fuisse  dixeram,  hominem  libera  et  bonorum  et  malorum  omnium  potestate  sic  esse  praeditum,  ut  nemo  peccandi  necessitati  subiaceat,  nemo  spiritu  Dei  necessario  ad  bonum  dirigatur,  illam  iterum  veterum  scriptorum  catervam  in  aciem  educit:  quo  hunc,  quem  repudio,  communem  fuisse  ecclesiae  consensum  demonstret.  Verum  frustra  laborat  eos  citando,  cum  quibus  libro  secundo  iam  transegi  ac  composui.  Quanquam  locum  hunc  meum  sic  convertit  Pighius,  ut  eos  omnes  improbare  videar,  qui  hominem  violenter  cogi  non  fatentur,  quum  voluntarium  oportere  esse  opus,  antequam  bonum  aut  malum  sit,  toties  doceam,  et  in  excludenda  coactione  ac  violentia  tam  diligenter  versatus  sim.  Nunc  ut  intelligant  lectores,  qua  de  re  mecum  certet:  quod  Deo  acceptum  referri  debere  tradimus,  quidquid  in  nobis  est  boni,  libenter  recipere  se  testatur:  sed  quum  modum  exprimere  incipimus,  quo  bonorum  omnium  autor  in  nobis  sit  Deus,  hic  statim  resistit:  quia  totum  non  aliter  tribui  Deo  sustinet,  nisi  ut  pars  homini  relinquatur.  Primo  igitur,  quum  locum  hunc  apostoli  protulissem:  Qui  coepit  in  vobis  opus  bonum,  perficiet  (Phil.  1,  G),  addideram:  Bonum  opus  inchoari  a  Deo  in  nobis,  iustitiae  et  amorem  et  desiderium  et  studium  in  nobis  excitando,  [pag.  197]  vel  magis  proprie,  corda  nostra  formando,  flectendo,  dirigendo  in  iustitiam.  Priorem  expositionis  partem  sine  controversia  amplectitur  Pighius:  in  altera  suspectum  me  habet,  quod  a  communi  piorum  usu  recedam,  quum  hominum  corda  dico  formari,  flecti  ac  dirigi.  Itane,  ut  novae,  et  a  communi  fidelium  sensu  alienae  censeantur  loquutiones,  quae  et  passim  occurrunt  in  scripturis,  et  ecclesiasticis  scriptoribus  subinde  in  ore  sunt?  Supra  ducentos  locos  ex  Augustino  adducere  mihi  facile  sit,  ubi  istis  verbis  utitur.  Sed  quid  spiritus  sanctus  in  scripturis,  unde  petenda  est  bene  loquendi  regula?  Hanc  orandi  formulam  nonne  dictat  fidelibus:  Inclina  cor  meum  in  testimonia  tua,  Domine  ^Psal.  119,  36).  Item:  Inclinet  Dominus  cor  nostrum  ad  se,  ut  amhulemus  in  omnibus  praeceptis  suis  (1  Reg.  8,  58).  Item:  Dominus  autem  dirigat  corda  vestra  in  caritatem  Dei,  et  exspectationem  Christi  (2  Thess.  3,  5).  Quid  plura?  Nulla  est  frequentior  sanctis  oratio,  quam  ut  Dei  spiritu  in  viam  rectam  dirigantur.  Imo  quum  et  corda  impiorum,  quos  spiritu  suo  specialiter  non  gubernat,  huc  illuc,  prout  visum  fuerit,  flectere  se  dicat,  quid  de  fidelibus  dicendum  est,  qui  non  amplius  sibi  vivunt,  sed  in  quibus  vivit  Christus?  Sicut  fluxus  aquarum,  inquit  Solomon  24*