25:374  pium  id  semper  fixum  manet,  Deum  esse  mundi  iudicem,  ut  in  omnia  scelera  animadvertat.  Ergo  impunitatis  fiducia  eripitur  hypocritis,  qui  nisi  mox  trahantur  ad  poenam,  sibi  blandiuntur.  Quod  sequitur  membrum  quidam  interpretes  corrumpunt,  subaudiendo  relativum:  Tempore  quo  labetur  pes  eorum:  quum  simpliciter  colligat  Moses  suo  tempore  lapsuros,  vel  quamvis  stare  se  putent,  ruinam  tamen  vel  lapsum  non  procul  abesse:  quod  melius  confirmat,  ubi  adiungit,  propinquum  esse  diem  afflictionis.  Sententia  haec  (ut  ante  dixi)  frequenter  occurrit  apud  prophetas,  opportunum  esse  Deo  tempus,  quo  peccata  quae  negligere  visus  est,  puniat:  ideoque  tolerantiam  iudicio  quod  differt  nihil  detrahere.  Duplex  autem  est  huius  doctrinae  usus,  ne  sibi  indulgeant  quibus  Deus  ad  tempus  parcit  :  deinde  ne  fidelium  animos  conturbet  impiorum  prosperitas,  sed  iustae  Dei  vindictae  locum  et  tempus  concedant.  Iam  vero  quia  Dei  cunctatio  hypocritas  securos  reddit,  ut  suis  vitiis  indormiant,  et  quamvis  audiant  reddendam  sibi  esse  rationem,  brevi  tamen  usura  libenter  fruuntur,  denunciat  Moses  propinquum  esse  diem,  et  festinare.  Nisi  enim  palam  eos  terreat  Deus,  ac  eos  in  angustum  redigat,  exsultant  in  sua  licentia.  Hinc  sacrilegae  illae  voces  quae  referuntur  apud  Isaiam  (5,  19):  Acceleret,  festinet  opus  eius,  ut  videamus:  appropinquet,  adveniat  consilium  sancti  Israel,  ut  sciamus.  Interea  tenendum  est  illud  (Habacuc  2,  3):  Si  moram  fecerit  prophetia  exspecta  eam,  quia  cito  veniet  neque  morabitur.  36.  Quia  iudicabit.  Contexunt  quidam  interpretes  hanc  sententiam  cum  superiore:  atque  ita  iudicare  accipiunt  pro  punire.  Ac  suffragari  eorum  sententiae  videtur  apostolus  in  epistola  ad  Hebraeos  (10,  31)  qui  hoc  testimonio  probat,  quam  horribile  sit  incidere  in  manus  Dei  viventis.  Verum  nihil  obstat  quominus  apostolus  iudicium  quod  in  consolationem  piorum  a  Mose  propositum  erat,  simul  transferat  in  diversum  usum,  ut  magis  solliciti  sint  fideles,  quo  propius  Deus  se  iudicem  in  ecclesia  ostendit  :  nisi  forte  sic  resolvere  placeat  Mosis  verba  :  Quamvis  Deus  iudicet  populum  suum,  placabilis  demum  erit,  vel  poenitentia  tangetur,  quo  irae  suae  vehementiam  temperet.  Utrovis  modo  intelligamus,  ad  summam  rei  parum  interest.  Postquam  enim  Dei  contemptoribus  et  apostatis,  qui  ecclesiae  Dei  domestici  censeri  volunt,  minatus  est  Moses,  nunc  se  ad  exteros  convertit  ac  denunciat  non  impune  quam  exercuerint  saevitiam  contra  Israelitas  illis  cessuram  esse:  quia  tandem  Deus  foederis  sui  memor,  ignoscet  electo  populo.  Si  Iudicare  accipias  pro  gubernare  vel  causam  suscipere  particula  >j  adversative  vertenda  erit:  quasi  dictum  esset:  Attamen,  vel  Caeterum  Deus  servorum  erit  vindex:  si  vero  sequamur  alterum  sensum,  tantundem  valebit  24*