6:373  DE  LIBERO  ARBITRIO.  nere  et  eligere,  sed  spiritus  directione  gubernatum;  cor  esse  voluntarium,  sed  reformatum  manu  Dei;  hominem  ipsum  et  conari  et  agere,  et  ad  Dei  obsequium  applicare  suas  facultates,  sed  pro  gratiae  mensura  quam  accepit.  Frustra  denique  Dei  bonitatem  praedicando  eam  huic  necessitati  alligare  nititur,  ut  omnibus  pariter  expositam  esse  oporteat.  Aliter  enim  Deus  ipse,  qui  bonitatis  [pag.  195]  misericordiaeque  suae  laudem  ex  eo  melius  elucere  iudicat,  si  eius  specimen  non  nisi  in  aliquibus,  in  aliis  vero  irae  iudiciique  exemplum  edat.  Nihilo  plus  rationis  habet,  quod  malignitatis  invidiam  conflare  nobis  nititur,  quia  salvificam  Dei  gratiam  non  nisi  electis  dicimus  exhiberi.  Hoc,  inquit,  est  eam  restringere.  At  Deus  non  ita  largam  vult  praedicari,  ut  libera  esse  desinat.  Libertas  porro  in  eo  est,  ut  eam  quibus  vult  impertiatur.  Quanquam  si  excutere  libeat,  quanta  vel  inscitia,  vel  improbitate  pervertat,  quaecunque  hoc  loco  citat  scripturae  testimonia,  immensum  erit  mare.  Scriptum  est,  inquit,  unum  nos  omnes  habere  patrem  Deum.  Non  ergo  his  pater  est,  illis  vitricus.  Verum  apud  quos  habentur  haec  verba?  Apud  fideles,  opinor.  Quid  ergo  hoc  ad  hominum  universitatem?  Apud  Malachiam  (2,  10)  habetur:  Numquid  non  unus  pater  est  omnium  nostrum?  Ut  demus  hic  non  Abraham,  sed  Deum  intelligendum  esse,  numquid  non  de  Israele,  hoc  est,  de  peculiari  et  electo  Dei  grege  propheta  loquitur?  Suavis  universis  cantatur  a  Davide  (Psal.  145,  9).  Certe,  et  miserationes  eius  super  omnia  opera  eius.  Ergone  spiritu  regenerationis  et  agrorum  pecora,  et  pisces  maris,  et  aves  coeli  donabit?  At  suavitatem  hanc  experiuntur  omnes,  qui  eam  amaritudine  sua  non  repellunt.  Fateor.  Sed  radicem  amaritudinis  solus  ille  spiritus  ex  cordibus  nostris  revellit,  per  quem  consecrantur  electi,  ut  pura  sint  ac  sancta  Dei  templa.  IN  LIBRUM  SEXTUM.  Iam  quum  parum  egisse  se  hactenus,  in  damnanda  nostra  doctrina,  cerneret,  si  rationes  ex  adverso  intactas  relinqueret,  quibus  et  multis  et  tam  firmis  munita  est,  eas  recensere  et  confutare  sexto  libro  instituit.  Saltem  hoc  sibi  propositum  esse  denunciat.  Verum  quia  sibi  in  hac  operis  parte  suae  imbecillitatis  [pag.  196]  conscius  est,  praecipuum  mox  robur  in  eo  locat,  ut  lectores  penitus  a  rationum  nostrarum,  non  examine  modo,  sed  etiam  intuitu  avertat.  Quaecunque,  inquit,  scripturae  proferantur,  in  illis  septis,  quae  tibi  circumdedi,  inclusum  te  contineas.  Est  enim  catholicae  ecclesiae  consensus,  a  quo  vel  minimum  recedere  exitiale  est.  Quid  autem,  si  aliud  certo  ex  scriptura  evincitur?  Nihil  te,  inquit,  totum  id  moveat.  Quin  etiam  si