41:373  373  SUR  LE  VI.  CHAP.  DE  DANIEL.  374  quoy  c'est,  et  a  quelle  intention  :  Quand  un  homme  est  excellent  en  quelque  don,  ce  n'est  point  pour  soy,  ne  pour  son  particulier,  mais  c'est  a  fin  qu'il  en  puisse  aider  en  commun  a  tous  les  autres.  Quand  donc  on  reiette,  et  qu'on  ne  tient  comte  de  ceux  ausquels  Dieu  aura  eslargi  de  ses  graces,  c'est  autant  comme  si  on  vouloit  despiter  le  Sainct  Esprit,  comme  si  on  le  vouloit  abatre  et  aneantir:  on  ne  se  scauroit  eslever  plus  ouvertement  a  l'encontre  de  Dieu  qu'en  faisant  cela,  mais  quoy?  on  voit  neantmoins  la  coustume  auiourd'hui  estre  tout  au  contraire,  quand  les  princes  voudront  ordonner  des  officiers,  regardent-ils  ceux  qui  sont  plus  doues  des  graces  de  Dieu?  il  est  vrai  qu'ils  prendront  tousiours  cette  couleur  la,  qu'ils  mettront  tousiours  en  instituant  leurs  officiers,  qu'ils  sont  gens  capables  et  idoines  pour  leur  office:  mais  cependant,  est-ce  ce  qu'ils  regardent:  Voila  un  homme  qui  est  vertueux,  et  pourtant  il  se  pourra  bien  acquiter  de  son  devoir.  O!  il  n'est  point  question  de  regarder  a  cela,  ne  de  scavoir  si  un  homme  ha  zele  pour  faire  qu'un  chacun  serve  a  Dieu,  qu'on  se  renge  soubs  son  obeissance,  que  les  choses  soient  bien  ordonnees,  qu'il  n'y  ait  point  de  scandales  ne  de  dissolutions  en  un  peuple,  ils  n'ont  gueres  de  regard  a  tout  cela,  mais  il  faudra  avoir  des  flateurs  de  court,  que  ceux  qui  auront  gaigne  les  aureilles  des  princes  auront  les  offices,  et  pour  eux,  et  pour  en  disposer  a  leur  poste,  et  comme  bon  leur  semblera,  et  voila  pourquoy  les  choses  sont  si  tres-confuses,  qu'on  ne  scait  plus  la  ou  on  en  est,  et  mesmes  ou  il  n'y  aura  liberte  d'eslire  et  choisir,  souventesfois  prendra-  on  ceux  qui  seront  les  plus  propres,  ie  m'en  rapporte  a  ce  qu'on  y  en  fait:  si  est-ce  que  nous  voions  ici  nostre  condemnation  devant  nous,  quand  Daniel  ha  este  choisi  par  le  Roy  Darius.  Et  comment?  D'autant  que  l'Esprit  estoit  plus  abondant  en  luy.  Apprenons  donc,  quand  il  sera  question  de  regarder  les  graces  de  Dieu,  qui  seront  plus  excellentes  en  l'un  qu'en  l'autre,  que  Dieu  nous  monstre  au  doigt  ceux  desquels  il  se  veut  servir.  Servons  nous  en  donc,  car  il  nous  faut  entendre  que  Dieu  aussi  desploie  les  graces  de  son  Esprit  a  nostre  profit  et  salut.  Or  si  cela  doit  estre  observe  aux  choses  temporelles,  que  sera-ce  de  l'Eglise,  en  ce  regime  spirituel,  la  ou  Dieu  doit  dominer  sur  tout,  faudra-il  choisir  gens  qui  facent  office  de  pasteurs,  sinon  qu'ils  soient  doues  des  graces  qui  sont  requises  en  tel  estat?  Que  dirons  nous  donc  de  ce  qu'on  en  fait  auiourd'hui  en  la  papaute?  il  est  vrai  qu'ils  appelent  bien  tout  cet  estat  la,  Ierarchie,  c'est  a  dire,  principaute  sacree,  que  cet  ordre  qu'ils  ont,  et  qu'ils  tiennent,  est  tout  plein  de  sainctete,  il  ni  ha  rien  qui  ne  soit  celeste,  mais  cependant,  ie  vous  prie,  qu'on  espluche  de  pres  tous  ceux  qui  sont  ordonnes  evesques  et  pasteurs,  pour  scavoir