52:372  ac  in  speculis,  conspicimus  quam  detestanda  sit  hominis  conditio,  nisi  Dei  gloriae  ex  animo  serviat.  Ergo  eiusmodi  exempla  optimam  exhortationis  materiam  nobis  praebent,  ut  sanctitati  et  innocentiae  studeamus.  Quod  autem  multi  abutuntur  hoc  testimonio,  ut  penes  volentem  et  currentem  constituant  quod  alibi  (Rom.  9,  16)  testatur  Paulus  esse  miserentis  Dei,  perquam  frivolum  est.  Neque  enim  hic  Paulus  de  electione  hominum  disputat,  ut  doceat  quaenam  sit  eius  causa,  quemadmodum  ad  Romanos  capite  nono:  sed  tantum  vult  nos  dissimiles  esse  impiis,  quos  exitio  suo  natos  esse  cernimus.  Proinde  stultum  est,  ex  his  verbis  colligere  sitne  in  hominis  potestate  se  aggregare  in  numerum  filiorum  Dei,  sibique  autorem  esse  suae  adoptionis.  Non  hoc  agitur  in  praesentia.  Sufficiat  brevis  ista  admonitio  adversus  eos,  qui  iubent  hominem  facere  ut  praedestinetur.  Quasi  vero  praescribat  Paulus  hominibus  quid  agere  debuerint  antequam  nati  essent,  imo  ante  constituta  mundi  fundamenta.  Alii,  qui  liberum  arbitrium  hinc  colligunt  homini  suppetere  ad  se  praeparandum  ut  aptus  sit  et  formatus  in  obsequium  Dei,  minus  quidem  inepti  sunt  prima  specie  quam  illi  priores:  nihil  tamen  firmum  afferunt.  Praecipit  apostolus  ut  se  expurgent  ab  immunditie  impiorum  quicunque  Domino  se  consecrare  cupiunt:  idem  passim  Deus  praecipit.  Neque  enim  aliud  hic  audimus,  quam  quod  habuimus  iam  apud  eundem  Paulum  compluribus  locis,  ac  praesertim  in  secunda  ad  Corinthios,  Mundamini,  qui  fertis  vasa  Domini.  Hinc  sine  controversia  patet,  nos  vocari  ad  sanctitatem.  Sed  alia  est  de  vocatione  officioque  Christianorum,  alia  de  facultate  vel  potentia  quaestio.  Requiri  a  fidelibus  ut  se  purificent,  non  negamus:  sed  has  esse  suas  partes,  alibi  Dominus  pronuntiat,  quum  per  Ezechielem  (36,  25)  promittit  se  missurum  aquas  mundas,  ut  mundemur.  Quare  potius  a  Domino  flagitandum  ut  nos  purget,  quam  frustra  in  hoc  tentandae  absque  eius  auxilio  vires  nostrae.  Vas  in  honorem  s  a  n  c  t  i  f  i  c  a  t  um  significat  separatum  in  usus  honestos  ac  splendidos.  Ita  et  patrifamilias  u  t  i  l  e  ,  pro  eo  quod  est  ad  gratos  usus  accommodum.  Postea  metaphoram  explicat,  quum  addit  nos  debere  esse  formatos  ad  omne  opus  bonum.  Facessant  ergo  insanae  fanaticorum  hominum  voces,  Serviam  gloriae  Dei  ut  Pharao.  Quid  enim  interest  modo  glorificetur  Deus?  Nam  hic  aperte  Deus  ostendit  qualiter  nos  sibi  servire  velit,  pie  scilicet  ac  sancte  vivendo.  22.  Iuveniles  cupiditates  fuge.  Sequere  autem  iustitiam,  fidem,  dilectionem,  pacem  cum  omnibus  invocantibus  Dominum  ex  puro  corde.  23.  Stultas  vero  et  ineruditas  quaestiones  vita,  sciens  quod  generant  pugnas.  24.  Atqui  servum  Domini  non  oportet  pugnare:  sed  placidum  esse  erga  omnes,  propensum  ad