49:372  ferando  proficiet  doctor,  nisi  illa  quam  dixi  moderatione  acrimoniam  obiurgationis  condiat?  Ergo  si  quid  prodesse  volumus  hominum  vitia  corrigendo,  testatum  illis  facere  convenit,  ab  amico  animo  correctiones  nostras  proficisci.  15.  Nam  etsi  decem  millia.  Patrem  se  dixerat:  hoc  sibi  apud  eos  peculiare  ac  proprium  esse  nunc  ostendit,  quia  solus  eos  in  Christo  genuerit.  In  hac  autem  comparatione  respicit  pseudoapostolos,  quibus  omnia  sic  deferebant  Corinthii,  ut  nullus  iam  propemodum  apud  eos  Paulus  ipse  foret.  Admonet  ergo  eos  ut  cogitent  quis  honor  patri  et  quis  paedagogo  haberi  debet:  quasi  diceret:  Novos  istos  doctores  colitis:  patior,  modo  me  patrem  esse  vestrum,  illos  vero  tantum  paedagogos  esse  memineritis.  Autoritatem  vero  sibi  asserendo,  se  alio  praeditum  esse  affectu  significat  quam  essent  illi,  quos  in  tanto  pretio  habebant.  Quasi  diceret:  Illi  in  vobis  docendis  elaborant:  esto,  sed  alius  est  patris  amor,  alia  sollicitudo,  aliud  studium,  quam  sit  paedagogi.  Quid,  si  etiam  ad  illam,  quam  prius  obiecit,  fidei  ruditatem  alludat?  Nam  quum  fastu  gigantes  essent  Corinthii,  fide  pueri  erant:  ideoque  ad  paedagogos  merito  allegantur.  Taxatur  etiam  in  ipsis  doctoribus  praepostera  et  maligna  ratio,  quod  primis  tantum  rudimentis  suos  discipulos  occupabant,  ut  suo  magisterio  semper  devinctos  tenerent.  In  Christo  enim.  Ratio  cur  unus  ipse  habendus  sit  pater  ecclesiae  Corinthiacae:  quia  scilicet  eam  genuerit.  Et  verbis  quidem  appositissimis  spiritualem  generationem  hic  desoribit,  quum  dicit  se  genuisse  in  Christo,  qui  solus  est  vita  animae:  causam  vero  formalem  ponit  evangelium.  Observemus  ergo,  tunc  nos  vere  gigni  coram  Deo,  dum  Christo  inserimur,  extra  quem  nonnisi  mera  mors  reperietur  :  id  vero  fieri  per  evangelium,  quia  quum  natura  simus  caro  et  foenum:  verbum  Dei,  sicut  Petrus  ex  Iesaia  docet,  semen  est  incorruptibile,  quo  renovamur  in  vitam  aeternam.  Tolle  evangelium,  et  omnes  manebimus  coram  Deo  maledicti  et  mortui.  Idem  postea  verbum,  quo  geniti  sumus,  lac  nobis  est  ad  nos  educandos:  idem  solidus  cibus  ad  nos  perpetuo  alendos.  Si  quis  obiiciat,  quum  gignantur  quotidie  novi  Deo  filii  in  ecclesia,  cur  patres  esse  negat  Paulus,  qui  sibi  successerant?  Facilis  est  solutio,  nempe  quod  hic  de  ecclesiae  primordio  loquatur:  ut  enim  plerique  aliorum  ministerio  geniti  fuissent,  manebat  tamen  uni  Paulo  hic  honor  illibatus,  quod  ecclesiam  Corinthiacam  fundasset.  Si  quis  iterum  roget,  annon  patres  censeri  debeant  pastores  universi:  cur  ergo  titulum  hunc  aliis  omnibus  detrahat  Paulus,  ut  sibi  uni  vindicet?  Respondeo,  hic  eum  comparative  loqui.  Proinde  utcunque  alioqui  patrum  titulus  illis  conveniret,  respectu  tamen  Pauli  nonnisi  paedagogi  erant.  Tenendum  etiam  memoria  quod  nuper  attigi,