6:371  RESPONSIO  CONTRA  PIGKHIUM  dederat  partes,  totamque  fere  laudem  adscripserat.  Sed  quia  periculum  erat,  ne  facta  laborum  suorum  mentione  uno  illo  duntaxat  verbo  prae  se  ferre  in  speciem  videretur,  aliquam  saltem  portionem  sibi  deberi,  addita  correctione  suspicionem  tollit,  dum  se  fuisse  negat  qui  laboraverit,  sed  hoc  totum  ex  Dei  gratia  potius  exstitisse.  Nulla  neque  veritati  magis  adversa,  neque  ad  excaecandum  nominem  capitalior  est  pestis,  quam  praesumpta  falsa  opinio:  praesertim  ubi  animo  pertinaciter  insidet.  Duo  haec  vult  inter  se  coniungere  Pighius:  Hominem  naturaliter  esse  hac  facultate  praeditum,  ut  tam  praevenire  bono  motu  Dei  gratiam  quam  subsequi  possit,  nec  aliter,  aut  offerri  nobis  Dei  gratiam,  nisi  ante  manum  porrigamus,  aut  efficacem  esse  in  nobis,  nisi  propria  virtute  eam  adiuvemus:  et  tamen  merum  esse  et  gratuitum  Dei  donum,  quidquid  gratiae  nobis  confert:  eum  esse  solum  qui  in  nobis  bona  opera  et  incipit  et  perficit:  ab  eo  nos  praeveniri,  ab  eo  confirmari  usque  in  finem.  Haec,  inquam,  perinde  ac  si  rite  congruerent,  sub  uno  iugo  componit  Pighius.  At  facilius  coelum  terrae  misceas.  Quid  ergo  causae  est,  cur  in  tantam  absurditatem,  velut  clausis  oculis,  praeceps  ruat?  Haec  una  scilicet,  quod  ubi  semel  animo  concepit,  aequaliter  omnibus  offerri  Dei  gratiam,  qui  se  modo  dignos  exhibeant,  hac  conceptione  impeditus  tenetur,  ne  quid  amplius  cernat  aut  iudicet.  Itaque  postquam  suis  encomiis  ornando  hominis  naturam,  Dei  gratiam  quantum  poterat  extenuavit:  mox  pudore  tactus,  eam  in  coelum  usque  evehit,  sed  manifesta  repugnantia;  neque  aliter  Augustinum  hic  aemulatur,  quam  simia  hominem.  Verum  qua  necessitate  constringitur,  ut  aequalem  gratiae  dispensationem  faciat?  Quia  pronunciet  Deus,  nolle  se  mortem  morientis,  sed  ut  revertatur  et  vivat  (Ez.  18,  23  et  33,  l  l  )  .  At  si  ex  eius  sensu  hoc  interpretamur,  cur  ergo  moritur,  quem  Deus  mori  non  [pag.  193]  vult?  quum  scriptum  sit:  Deus  autem  noster  in  coelo,  omnia  quaecunque  voluit  fecit  (Psal.  115,  3).  Hic  certe  nodus  erit  gordianus,  si  illud  Ezechielis,  Deum  nolle  mortem  morientis,  de  arcano  eius  consilio  accipias.  Quamobrem  sic  intelligi  necesse  est,  sicut  et  Augustinus  multis  locis  disseruit,  nihil  Deum  omittere,  quod  ad  reducendos  in  salutis  viam  homines  pertineat,  si  modo  sani  forent:  quod  autem  non  redeant  vocati,  ipsis  non  aliud  quam  pravitatis  propriae  morbum  obstare.  Vult  ergo  Deus  morientem  vivere,  sicuti  eius  voluntatem  nobis  aestimare  fas  est,  omnibus  scilicet  adminiculis  hominem  ipsum  adiuvando:  ne  quid  sibi  obstitisse,  quam  propriam  culpam,  causari  queat.  Manet  tamen  interea  Deo  arcanum  suum  consilium,  quo  hunc  praeterit,  illum  eligit:  de  quo  ne  curiosius  vestiget,  qui  non  vult  opprimi  a  gloria.  Hoc  si  caperet  Pighius,  falsum  illud  de  aequali  gratiae