55:368  esse  evangelio,  ne  Deo  simus  iniurii:  sed  amandum  etiam  illud  esse,  quia  vitam  aeternam  nobis  afferat.  Unde  etiam  colligimus  quid  maxime  in  evangelio  quaerendum  sit:  nempe  gratuitum  salutis  donum.  Nam  quod  illic  Deus  ad  poenitentiam  et  timorem  nos  hortatur,  non  debet  a  Christi  gratia  separari.  Atque  ut  nos  prorsus  in  Christo  retineat  apostolus  iterum  repetit  contineri  in  ipso  vitam:  ac  si  diceret,  non  aliud  adipiscendae  vitae  medium  nobis  a  Deo  patre  statui.  Ac  tria  quidem  summatim  hic  complexus  est  apostolus  :  nos  scilicet  omnes  morti  addictos  esse,  donec  Deus  gratuita  sua  bonitate  nos  in  vitam  restituat.  Aperte  enim  pronuntiat  vitam  a  Deo  donari:  unde  et  ipsa  nos  destitui  sequitur,  nec  meritis  posse  acquiri.  Deinde  hanc  vitam  nobis  per  evangelium  conferri  docet,  quia  illic  patefit  Dei  bonitas  et  paternus  erga  nos  amor.  Postremo  non  aliter  eius  vitae  nos  fieri  compotes  dicit,  quam  dum  fide  in  Christum  inserimur.  12.  Qui  non  habet  Est  proximae  sententiae  confirmatio.  Sufficere  quidem  illud  debebat,  Deum  non  alibi  quam  in  Christo  vitam  locasse  ut  inde  petatur:  verum  ne  quis  alio  deflectat,  a  spe  vitae  excludit  omnes  qui  eam  in  Christo  non  quaerunt.  Scimus  quid  sit  habere  Christum:  nam  fide  possidetur:  vita  ergo  privat  omnes  qui  alieni  sunt  a  Christi  corpore.  Sed  videtur  hoc  rationi  minime  consentaneum:  nam  summos  viros  exstitisse,  et  heroicis  virtutibus  praeditos  historiae  narrant:  qui  tamen  a  Christo  prorsus  erant  extranei.  Absurdum  autem  videtur,  tantae  praestantiae  nihil  habere  honoris.  Respondeo,  longe  nos  falli,  si  putamus  probari  Deo  quidquid  in  oculis  nostris  excellit:  quin  potius  (ut  est  apud  Lucam  16,  15)  quod  altum  est  hominibus,  abominatio  est  apud  Deum.  Quia  enim  abscondita  est  nobis  cordis  immundities,  externa  specie  contenti  sumus:  atque  Deus  sub  hac  latentes  foedissimas  sordes  videt.  Itaque  non  mirum  si  illi  foeteant  speciosae  virtutes,  quae  et  ab  impuro  corde  manant,  neque  in  rectum  finem  tendunt.  Porro  unde  cordis  puritas,  unde  rectum  pietatis  studium,  nisi  a  spiritu  Christi?  Nihil  ergo  laude  dignum,  nisi  in  Christo.  Quamquam  alia  est  ratio,  quae  omnem  dubitationem  eximit.  Hominum  enim  iustitia  in  remissione  peccatorum  sita  est.  Hanc  si  tollas,  certa  Dei  maledictio,  et  mors  aeterna  nos  omnes  manet.  Solus  autem  Christus  est  qui  patrem  nobis  conciliat,  sicuti  eum  semel  mortis  suae  sacrificio  placavit.  Unde  sequitur,  nemini  propitium  esse  Deum,  nisi  in  Christo  :  nullam  quoque  nisi  in  ipso  iustitiam  esse.  Si  quis  Cornelium  obiiciat,  quem  Lucas  acceptum  fuisse  Deo  testatur,  priusquam  vocatus  esset  ad  fidem  evangelii  :  respondeo  breviter,  sic  interdum  agere  Deum  in  nobis,  ut  semen  fidei  non  primo  statim  die  emergat.  Non  habuit  Cornelius  claram  et  dilucidam  Christi  notitiam:  sed