25:368  quidnam  facturi  sint:  quando  haec  occultatio  nonnisi  ad  externam  gratiae  manifestationem  pertinet.  Denique  similitudo  est  ab  hominibus  sumpta,  qua  significat  Deus,  se  fastidio  victum  non  amplius  fore  populi  ducem  ac  custodem,  donec  re  ipsa  pateat  modis  omnibus  esse  intractabiles.  Quod  ex  ratione  mox  addita  colligitur,  ubi  perversam  eorum  naturam  et  infidelitatem  accusat:  ac  si  diceret,  post  longa  experimenta  non  aliud  restare  nisi  ut  ipsos  valere  iubeat.  21.  Ipsi  ad  zelum.  Iam  longius  progreditur,  Deum  scilicet,  ubi  se  ad  tempus  subduxerit,  tandem  populi  apertum  fore  hostem,  ut  par  pari  referat.  Formam  vero  talionis  notat,  quod  sicuti  Deo  probrose  opposuerant  nihili  figmenta  et  vanitates,  ita  vicissim  contra  eos  extollet  barbaras  gentes  et  nullius  pretii.  Haec  quoque  similitudo  sumpta  est  a  zelotypis  maritis  qui  si  contemni  se  ab  impuris  uxoribus  videant,  obiectis  contrariis  amoribus  se  ipsos  ulciscuntur.  Cur  zelotypiae  affectum  in  se  Deus  suscipiat,  dictum  est  in  secundo  legis  praecepto,  et  nuper  aliquid  attigi:  nunc  tantum  docet  Moses  aequissimum  fore  vindictae  genus,  ubi  Deus  per  gentes  contemptas  et  ignobiles  insultabit  apostatis,  qui  in  eius  contumeliam  sibi  idola  fabricarunt.  Porro  eiusdem  sententiae  effectus  identidem  exhibitus  fuit,  ubi  tyrannice  a  vicinis  gentibus  oppressi  fuerunt.  Verum  quidem  est  Aegyptios,  Syrios,  Assyrios  et  Chaldaeos  in  populis  nihili  et  stultis  gentibus  comprehendi,  quamvis  potentia  et  opibus  praestarent,  aliisque  splendidis  dotibus  essent  celebres:  sed  mirum  non  est  prae  illa  nobilitate  qua  Deus  ornaverat  Israelitas,  alios  omnes  tanquam  quisquilias  reputari.  Summa  est,  ultionem  Deo  fore  in  promptu,  qua  puniat  populi  sui  vanitates:  quia  ex  nihilo  creare  poterit  hostes,  a  quibus  redigantur  in  nihilum.  Quod  vero  Paulus')  latius  extendit  hanc  sententiam  id  facit  concinna  allusione:  quoniam  ubi  gentes  Deus  in  ecclesiam  suam  ascivit,  ad  zelotypiam  Iudaeos  accendit,  ut  tandem  ignominia  tacti  resipiscerent.  Certe  gentium  vocatio  perinde  fuit,  ac  si  umbras  crearet,  quas  praeferret  reprobo  populo.  22.  Ignis  enim  succendetur.  Idem  confirmat,  sed  magis  generaliter.  Iram  enim  suam  comparat  igni  accenso,  qui  penetrabit  usque  ad  profundissimas  quasque  abyssos:  terram  eorum  funditus  absumet  ut  ne  montium  quidem  radicibus  parcat.  Frequenter  quidem  occurrit  haec  metaphora:  sed  nunc  plus  exprimitur  quam  aliis  locis.  Eodem  etiam  sensu  mox  subiicitur,  Deum  consumpturum  omnia  sua  flagella  et  sagittas  contra  ipsos:  sicuti  ubi  exarsit  implacabilis  iracundia,  nullus  est  saeviendi  modus.  Quanquam  verbum  PISON  sumi  etiam  potest  1)  Mom.  ll,  ll.