6:367  RESPONSIO  CONTRA  PIGHIUM  dis  contriti  et  afflicti  sacrificium  David  canit  (Psal.  51,  19).  Verum  illud  quoque  scire  operae  pretium  est,  unde  illa  quam  propheta  sic  commendat,  humilitas,  ac  sermonum  Dei  reverentia.  Certum  autem  est,  superbia  et  caeca  confidentia  semper  turgere  cor  hominis,  donec  spiritu  Dei  domitum  subactumque  ad  modestiam  et  submissionem  se  componit.  Neque  vero  hoc  modo  praeparari  hominem  ad  recipiendum  iustitiae  donum  negamus:  sed  spiritus  sancti  directione,  non  suo  ingenio.  Non  nisi  laborantes  ad  se  et  oneratos  Christus  vocat  (Matth.  11,  28):  verum,  ut  onus  nostrum  sentiamus,  ac  sub  eo  gemamus,  ipse  etiam  facit.  Fatemur  verissimum  esse  vulgare  proverbium:  unicum  esse  curationis  principium,  ubi  morbus  agnoscitur.  Ergo  ut  se  tibi  medicum  exhibeat  Christus,  morbum  tuum  agnoscas  oportet.  Morbi  porro  agnitio  ad  humilitatem  timoremque  Dei,  ad  iudicii  metum  atque  horrorem,  ad  tui  displicentiam,  te  rediget.  Nunc  an  eiusmodi  affectum  concipere  naturaliter  possint  homines,  consideremus.  Verum  et  ipsa  experientia  clamat  non  huc  ante  adduci,  quam  totum  naturae  sensum  deposuerint  :  et  scriptura  idem  ubique  testatur,  [pag.  187]  Castiget  ergo  nos  Dominus  necesse  est,  ut  eruditi  reddamur:  quum  ex  nobis  simus  tanquam  indomiti  vituli,  sicut  dicit  Ieremias  (31,  18.  19).  Ac  ne  quis  de  externa  virga  loqui  excipiat,  secus  ipse  mox  interpretatur:  Converte  me  Domine,  inquit,  et  convertar.  Postquam  me  convertisti,  egi  poenitentiam:  postquam  ostendisti  mihi,  percussi  femur  meum,  confusus  sum  et  erubui.  Haec  omnia  peccati  odium,  mortis  horrorem,  dolorem  ex  offensa,  gratiae  desiderium,  quae  ad  humani  arbitrii  potentiam  refert  Pighius,  vides  ut  Deo  accepta  propheta  referat.  Quanquam  hanc  obiectionem  subtiliter  sibi  videtur  occupare,  quum  subinde  nos  provocari  ac  sollicitari  a  Deo  fatetur,  sed  si  modo  conemur  ipsi,  laboremus,  neque  desimus  obviae  et  adiutrici  eius  gratiae.  Verum  quum  eo  modo,  inter  Deum  et  hominem  dimidiet,  imo  quum  penes  hominem  ea  relinquat,  quibus  tota  poenitentiae  vis  continetur,  qualiter  hoc  cum  prophetae  verbis  convenire  poterit,  quae  totam  poenitentiam,  adeoque  primum  eius  exordium,  a  solo  Deo  proficisci  ostendunt?  Nulli,  inquit,  deest  gratia,  nisi  qui  deest  ipse  sibi.  Fateor  sane:  modo  mihi  vicissim  concedat,  et  bona  voluntate  defici,  et  virtute  destitui  omnes,  nisi  quibus  utrumque  Deus  subministrat:  eum  porro  qui  et  bene  vult,  et  efficaciter  conatur,  sibi  non  deesse.  Neminem,  inquit,  violenter  cogit.  Sane:  sed  ut  voluntarios  habeat  servos,  qui  sponte  sequantur  ad  obsequium,  cor  novum  in  illis  creat,  et  spiritum  rectum  innovat  in  visceribus  eorum  (Psal.  51,  12),  Postea  tamen  aliquatenus  vela  colligit.  Nam  triplicem  gratiae  effectum,  quo  Dominus  proprie  ac  specialiter  suos  electos  praeter  naturam  communeque