47:367  367  IN  EVANGELIUM  IOANNIS  368  similitudo,  quod  quum  acerrimus  sit  mulieris  dolor,  cito  evanescit.  Non  parva  igitur  haec  levatio  erat  discipulis,  quum  dolorem  suum  audirent  minime  diuturnum  fore.  Iam  ad  nos  accommodandus  est  huius  doctrinae  usus.  Ex  quo  spiritu  Christi  regeniti  sumus,  debebat  in  nobis  vigere  gaudium,  quod  omnem  malorum  sensum  abstergeret:  decebat,  inquam,  nos  puerperis  esse  similes,  quae  solo  foetus  sui  conspectu  sic  moventur,  ut  illis  suus  dolor  non  doleat.  Sed  quia  primitias  tantum  accepimus  et  quidem  valde  tenues,  vix  modicas  sentimus  spiritualis  laetitiae  guttas,  quae  dolori  nostro  adspersae  eius  acerbitatem  leniant.  Et  tamen  exigua  ista  portio  clare  ostendit,  adeo  nunquam  obrui  moerore  qui  Christum  fide  intuentur,  ut  in  extremis  malis  gloriose  tamen  exsultent.  Interea  vero  quoniam  haec  omnibus  creaturis  imposita  est  conditio,  ut  parturiant  usque  ad  ultimum  redemptionis  diem,  sciamus  nobis  quoque  gemendum  esse,  donec  ex  continuis  praesentis  vitae  miseriis  liberati  fidei  nostrae  fructum  palam  cernamus.  In  summa,  puerperis  similes  sunt  fideles,  quatenus  in  Christo  renati  iam  in  coeleste  Dei  regnum  et  beatam  vitam  ingressi  sunt:  similes  autem  gravidis  et  parturientibus  feminis,  quatenus  adhuc  captivi  in  carnis  ergastulo  ad  felicem  illum  statum  suspirant,  qui  sub  spe  latet  absconditus.  22.  Gaudium  vestrum  nemo  tollet.  Gaudii  pretium  non  parum  auget  perpetuitas.  Nam  hinc  sequitur  leves  esse  aerumnas  et  aequo  animo  tolerandas,  quae  momentaneae  sunt*  Porro  his  verbis  admonet  Christus,  quodnam  sit  verum  gaudium.  Necesse  est  ut  suis  gaudiis  cito  privetur  mundus,  quae  nonnisi  in  rebus  caducis  quaerit.  Ergo  ad  Christi  resurrectionem  veniendum,  in  qua  aeterna  est  stabilitas.  Visurum  se  discipulos  intelligit,  quum  rursus  eos  visitabit  spiritus  sui  gratia,  ut  perpetuo  eius  conspectu  fruantur.  23.  Non  interrogabitis  quidquam.  Postquam  discipulis  laetitiam  promisit  Christus  ex  invicta  fortitudine  et  constantia,  nunc  alteram  spiritus  gratiam  qua  donandi  erant  praedicat,  nempe  tantam  intelligentiae  lucem,  quae  ipsos  ad  coelestia  usque  arcana  evehat.  Tanta  erat  tunc  in  illis  tarditas,  ut  ad  minimum  quemque  scrupulum  haesitarent:  nam  ut  pueri  alphabetarii  versum  unum  sine  pluribus  remoris  non  continuant,  ita  in  singulis  fere  Christi  verbis  quaedam  erat  offensio,  quae  illorum  profectum  impediret.  Paulo  post  vero  spiritu  sancto  illuminati  non  amplius  remoras  ullas  passi  sunt,  quin  familiaris  ac  nota  illis  esset  Dei  sapientia,  ut  inoffenso  cursu  inter  Dei  arcana  pergerent.  Non  desierunt  quidem  apostoli,  etiam  quum  in  summum  sapientiae  gradum  evecti  essent,  os  Christi  interrogare:  sed  hic  tantum  fit  duplicis  status  comparatio,  ac  si  diceret  Christus,  eorum  ruditatem  correctum  iri,  ut,  qui  in  minimis  quibusque  nunc  sub-