6:366  non  plus  sapere  Deo  permittit,  quam  ipse  stulto  suo  cerebro  apprehendat.  Hinc  illa  exsecrabilis  blasphemia:  si  Deus  ex  duobus  malis  et  pari  damnationi  obnoxiis,  et  adhuc  in  malo  contumaciter  perstantibus,  in  alterum  animadvertat,  alterum  non  modo  venia,  sed  suo  quoque  amore  dignetur,  non  misericordiam  fore  laude  dignam,  sed  stultam,  irrationabilem,  et  insani  domini  indulgentiam,  dignique  prorsus,  qui  servos  universos  malos  ac  contumaces  habeat.  Ego  Deo  suae  tum  iustitiae,  tum  sapientiae  defensionem  relinquam:  tantum  efficiam,  ut  causam  ipse  suscipiat,  suoque  ore  reum  hic  fieri  se  profiteatur.  Pollicetur  per  Iesaiam  (65,  1),  fore  ut  ab  iis,  qui  eum  non  quaesierint,  reperiatur:  ut  appareat  ac  se  manifestet  iis,  quibus  eum  cognoscere  nihil  curae  erat.  An  omnibus  praestitit  hoc  beneficium?  Constat  aliquibus  duntaxat.  Quod  si  melius  adhuc  scire  cupias,  quam  non  exspectet  dum  sibi  homines  accedant,  sed  aversos  et  alienatos  ad  se  trahat,  eos  intuere,  in  quibus  completa  fuit  haec  prophetia,  et  diligenter  expende  quales,  antequam  converterentur,  fuerint:  ita  nihil  de  hac  re  amplius  haesitabis.  Sumamus  ergo,  quod  de  Ephesiis  tradit  Paulus  (Ephes.  2,  1),  suam  erga  eos  misericordiam  Deum  explicuisse,  non  quum  ad  eam  recipiendam  sinum  protenderent,  sed  quum  mortui  peccatis  ac  delictis  Satanae  militarent,  quum  demersi  in  pravis  concupiscentiis  carni  tantum  et  mundo  obsequerentur,  quum  natura  essent  filii  irae,  sicut  et  caeteri,  quum  sine  Christo  et  sine  Deo  viverent.  Nondum  urgeo,  quod  tamen  iure  meo  liceret,  quantum  a  praeparatione  absit  talis  status.  Solum  ex  Pighio  velim  discere,  cur  Ephesios  potius,  quam  alios  quoslibet,  amplexus  fuerit.  Si  mihi  dolorem,  bonas  cogitationes,  pia  desideria  obiiciat,  nihil  tale  admittunt  Pauli  verba.  Quin  etiam  ne  cui  in  mentem  venirent  eiusmodi  nugae,  nominatim  aliis  fuisse  penitus  similes  exprimit,  a  quibus  tamen  gratuito  Dei  favore  discreti  ac  separati  [pag.  1861  fuerint.  Natura  eratis  filii  irae,  inquit,  sicut  et  reliqui  (Ephes.  2,  3).  Quasi  diceret,  quum  esset  omnium  communis  causa  et  par  conditio,  non  in  vobis  invenit  causam  Deus,  cur  vos  ab  aliis  discerneret,  sed  ex  misericordia  sua  sumpsit.  Nunc,  cur  ita  faciat  si  rogetur,  iampridem  illo  nobili  responso  hanc  quaestionem  praeoccupavit:  Miserebor  cuius  miserebor  (Exod.  33,  19;  Rom.  9,  15).  Quo  scilicet  hanc,  de  qua  loquimur,  in  eligendis  hominibus  misericordiae  suae  discretionem,  ut  est  sensu  nostro  longe  altior,  ita  superiore  loco  statuit.  Adducit  tamen  testimonia,  quibus  innuere  videtur  Dominus,  non  aliis  paratam  fore  suam  gratiam,  nisi  qui  se  ante  praeparaverint.  Ad  quem  inquit,  respiciam,  nisi  ad  pauperculum  et  contritum  spiritu,  trementemque  ad  sermones  meos  (Ies.  66,  2)?  Sane  humiles  Deus  respicit:  sicut  illi  acceptum  cor-