55:366  resurrectionis  suae  potentia  ostensum  esse  filium  Dei,  continuo  post  addit,  per  sanctificationem  spiritus.  Quia  quaecunque  in  Christo  refulgent  divinae  gloriae  signa:  nihilominus  obscura  nobis  essent,  et  effugerent  conspectum  nostrum,  nisi  fidei  oculos  nobis  aperiret  spiritus.  Nunc  intelligunt  lectores  cur  spiritum  cum  aqua  et  sanguine  Iohannes  testem  adduxerit:  quia  scilicet  proprium  spiritus  officium  est,  Christi  sanguine  mundare  conscientias  nostras:  facere  ut  allata  ab  ipso  purgatio  in  nobis  sit  efficax.  Qua  de  re  aliquid  dictum  est  initio  proximae  epistolae,  ubi  Petrus  eandem  fere  loquutionem  usurpat:  nempe  quod  spiritus  sanctus  animas  nostras  sanguinis  Christi  adspersione  purget.  Caeterum  ex  his  verbis  colligere  licet,  fidem  non  apprehendere  nudum  vel  inanem  Christum:  sed  vivificam  simul  eius  virtutem.  Quorsum  enim  prodesset  missum  in  terram  Christum  fuisse,  nisi  Deum  mortis  suae  sacrificio  placasset  ?  nisi  abluendi  munus  a  patre  illi  esset  iniunctum?  Obiici  tamen  poterit,  supervacuam  esse  distinctionem  quae  hic  ponitur,  quia  Christus  peccata  expiando,  nos  mundaverit:  ergo  rem  unam  apostolus  bis  nominat.  Fateor  quidem  in  expiatione  simul  ablutionem  includi:  itaque  non  statui  aquae  et  sanguinis  discrimen,  quasi  res  sint  disiunctae:  verum  si  quisque  nostrum  infirmitatem  suam  reputet,  facile  agnoscet  non  frustra  nec  temere  sanguinem  ab  aqua  discerni.  Deinde  (ut  iam  dictum  est)  apostolus  ad  legis  ritus  alludit.  At  quis  Deus  humanae  infirmitatis  causa  non  sacrificia  tantum,  sed  ablutiones  quoque  olim  instituerat.  Utriusque  partis  veritatem  in  Christo  fuisse  exhibitam,  distincte  exprimere  apostolus  voluit.  Qua  ratione  paulo  ante  dixerat,  non  in  aqua  solum.  Significat  enim  non  modo  partem  aliquam  salutis  nostrae  in  Christo  inveniri,  sed  omnes  numeros  (ut  ita  dicam)  completos:  ita  ut  nihil  alibi  sit  amplius  quaerendum.  9.  Si  testimonium  hominum.  A  minori  ad  maius  ratiocinatur  quam  ingrati  sint  homines,  si  Christum  divinitus  (ita  ut  retulit)  approbatum  repudient.  Nam  si  in  negotiis  humanis,  hominum  dictis  stamus,  qui  mentiri  et  fallere  possunt:  quam  absurdum  erit,  Deum  minus  fidei  in  suo  foro  (ut  ita  loquar),  ubi  summus  est  iudex,  apud  nos  obtinere?  Sola  igitur  nobis  pravitas  obstat  ne  Christum  recipiamus,  quando  suae  virtuti  fidem  legitima  probatione  facit.  Porro  Dei  testimonium  vocat  non  modo  quod  spiritus  cordibus  nostris  reddit,  sed  quod  etiam  habemus  ab  aqua  et  sanguine.  Yis  enim  illa  purgandi  et  expiandi,  non  terrena,  sed  coelestis  fuit.  Quare  non  vulgari  hominum  more  aestimandus  est  Christi  sanguis:  sed  consilium  Dei  potius  respicere  convenit,  quo  fuit  ordinatus  ad  delenda  peccata,  et  vim  illam  divinam  quae  inde  fluxit.