47:366  et  missionem  spiritus,  quia  tunc  oppressa  iacuit  quodammodo  eorum  fides.  Tristitia  vestra  in  gaudium  vertetur.  Gaudium  intelligit  quo  praediti  fuerunt  accepto  spiritu:  non  quod  immunes  postea  fuerint  a  tristitia,  sed  quod  spirituali  gaudio  absorptum  fuerit  quidquid  ferendum  erat  tristitiae.  Scimus  apostolos  quamdiu  vixerunt,  certasse  duram  militiam,  indignis  probris  fuisse  tractatos,  multas  habuisse  luctus  causas,  sed  spiritu  renovati  priorem  infirmitatis  sensuda  exuerant,  ut  heroica  altitudine  facile  calcarent  quidquid  malorum  ingerebatur.  Hic  ergo  praesens  infirmitas  cum  spiritus  virtute  confertur,  qua  mox  donandi  erant.  Nam  ad  tempus  fere  obruti  postea  non  modo  alacriter  pugnarunt,  sed  splendidum  egerunt  triumphum  in  mediis  pugnis.  Quanquam  simul  notandum  est,  non  modo  innui  tempus  medium  inter  Christi  resurrectionem  et  mortem  apostolorum,  sed  quod  postea  etiam  sequutum  est,  ac  si  diceret  Christus  :  Iacebitis  ad  tempus  exiguum  tanquam  prostrati,  sed  ubi  vos  erexerit  spiritus  incipiet  novum  gaudium,  quod  per  continuos  progressus  augebitur,  donec  recepti  in  coelestem  gloriam  solide  gaudeatis.  21.  Mulier,  quum  parit,  tristitiam  habet,  quia  venit  hora  eius  :  quum  autem  peperit  filium,  non  amplius  reminiscitur  afflictionis  propter  gaudium,  quod  natus  sit  homo  in  mundum.  22.  Et  vos  igitur  tristitiam  quidem  nunc  habetis  :  rursum  autem  videbo  vos,  et  gaudebit  cor  vestrum,  et  gaudium  vestrum  nemo  tollet  a  vobis.  23.  Et  in  illa  hora  me  non  interrogabitis  quidquam.  Amen,  amen,  dico  vobis,  quod  quaecunque  petieritis  a  patre  in  nomine  meo,  dabit  vobis.  24.  Hactenus  non  petiistis  quidquam  in  nomine  meo:  petite,  et  accipietis,  ut  gaudium  vestrum  plenum  sit.  21.  Mulier  quum  parit.  Similitudine  proximam  sententiam  confirmat,  imo  clarius  sententiam  suam  exprimit,  quod  scilicet  non  tantum  gaudio  mutandus  sit  eorum  moeror*  sed  materiam  quoque  ac  segetem  gaudii  in  se  contineat.  Fit  saepenumero,  ubi  rebus  adversis  successit  prosperitas,  ut  homines  pristini  doloris  obliti  totos  se  in  laetitiam  effundant:  dolor  tamen  qui  praecessit  non  est  laetitiae  causa.  Christus  autem  fructuosam  suorum  tristitiam  fore  significat,  quam  evangelii  causa  pertulerint.  Et  certe  non  alius  dolorum  omnium  quam  infelix  exitus  esse  potest,  nisi  quum  in  Christo  benedicuntur.  Sed  quia  crux  Christi  semper  inclusam  habet  in  se  victoriam,  merito  dolorem,  qui  inde  concipitur,  Christus  ipse  similem  facit  dolori  parturientis  feminae,  qui  mercede  sua  pensatur,  dum  foetus  in  lucem  editus  puerperam  exhilarat  Non  quadraret  autem  similitudo,  nisi  gaudium  pareret  dolor  in  Christi  membris,  dum  eius  passionibus  communicant:  sicuti  parturitio  in  muliere  causa  est  partus.  Huc  etiam  aptanda  est