55:364  6.  Hic  est  qui  venit  per  aquam  et  sanguinem,  Iesus  Christus:  non  in  aqua  solum,  sed  in  aqua  et  sanguine.  Et  spiritus  est  qui  testificatur:  quandoquidem  spiritus  est  veritas.  7.  Nam  tres  sunt  qui  testificantur  in  coelo,  pater,  sermo,  et  spiritus  sanctus:  et  hi  tres  unum  sunt  8.  Et  tres  sunt  qui  testificantur  tn  terra,  spiritus,  aqua,  et  sanguis:  et  hi  tres  in  unum  conveniunt.  9.  Si  testimonium  hominum  recipimus,  testimonium  Dei  maius  est:  quoniam  hoc  est  testimonium  Dei,  quod  testificatus  est  de  filio  suo.  6.  Hic  est  qui,  ete.  Ut  tuto  fides  nostra  in  Christo  quiescat,  solidam  umbrarum  legis  substantiam  in  eo  constare  dicit.  Neque  enim  dubito  quin  ad  veieres  legis  ritus  alludat  in  vocibus  aquae  et  sanguinis.  Huc  porro  tendit  comparatio:  non  tantum  ut  legem  Mosis  abolitam  esse  sciamus  Christi  adventu,  sed  ut  in  ipso  quaeramus  eorum  complementum,  quae  olim  figurabant  caeremoniae.  Tametsi  vero  plures  erant  species,  tamen  sub  his  duabus  totam  sanctitatis  et  iustitiae  perfectionem  apostolus  designat.  Aqua  enim  abluebantur  omnes  sordes,  ut  homines  nonnisi  puri  et  mundi  ad  Deum  accederent.  In  sanguine  erat  expiatio,  et  plenae  cum  Deo  reconciliationis  pignus  :  sed  lex  externis  tantum  symbolis  adumbravit  quod  solide  ac  reipsa  a  Messia  praestandum  erat.  Apte  igitur  probat  Iohannes  Iesum  esse  Christum  Domini,  olim  promissum,  quia  secum  attulit  quo  nos  omni  ex  parte  sanctificet.  Ac  de  sanguine  quidem,  quo  Christus  Deum  placavit,  nulla  est  dubitatio:  sed  quomodo  per  aquam  venerit,  quaeri  potest.  Nam  hoc  ad  baptismum  referri  non  est  probabile.  Ego  certe  existimo  Iohannem  hic  fructum  et  effectum  exprimere  eius  rei  quam  in  historia  evangelica  narrat.  Nam  quod  illic  dicit,  ex  Christi  latere  fluxisse  aquam  et  sanguinem,  haud  dubie  pro  miraculo  habendum  est.  Scio  tale  quiddam  mortuis  naturaliter  accidere:  vero  certo  Dei  consilio  factum  est  ut  Christi  latus  sanguinis  et  aquae  fons  esset:  ut  scirent  fideles  veram  munditiem  (cuius  figurae  erant  veteres  baptismi)  in  eo  sibi  constare:  ut  scirent  etiam  completum,  quod  omnes  sanguinis  adspersiones  olim  promiserant.  Quare  haec  brevis  partitio  plurimum  habet  gratiae,  quia  summatim  ostendit  quorsum  praecipue  tenderent  caeremoniae  veteres:  nempe  ut  homines  ab  inquinamentis  purgati,  et  soluti  omnibus  piaculis,  Deum  haberent  propitium,  et  illi  consecrarentur:  deinde  veritatem  in  Christo  fuisse  exhibitam,  quia  lex  praeter  visibiles  figuras  nihil  habebat.  Qua  de  re  plura  9  et  10  ad  Hebraeos  capite  diximus.  Spiritus  est  qui  testificatur.  Hoc  membro  docte  quomodo  vim  illam  Christi  sentiant  fideles:  quia  scilicet  Dei  spiritus  eos  certiores  reddat:  et  ne  vacillet  eorum  fides,  addit  plenam  et  solidam  firmi-