54:364  les  hommes  n'ayent  plus  rien  de  commun  avec  Dieu,  et  avec  leur  Createur.  Quand  donc  un  homme  se  desborde  iusques  la,  ne  faut-il  pas  bien  que  Dieu  se  leve,  et  qu'il  monstre  une  rigueur  extreme  a  l'encontre  de  luy?  Or  apprenons  donc  en  premier  lieu,  d'honorer  la  verite  de  l'Evangile,  laquelle  nous  voyons  estre  tant  precieuse  et  si  honorable  devant  Dieu.  Et  puis  qu'ainsi  est  que  Dieu  estime  plus  sa  saincte  Parole,  qu'il  ne  fait  point  ce  qui  semble  estre  excellent  au  monde,  qu'en  toute  humilite  et  reverence  nous  la  recevions,  qu'un  chacun  s'y  assuiettisse  :  et  si  nous  voulons  faire  hommage  a  nostre  Dieu,  que  nous  le  monstrions  en  cest  endroit,  c'est  de  nous  ranger  en  l'obeissance  de  sa  Parole,  cognoissans  que  c'est  la  ou  il  nous  faut  addonner  du  tout,  comme  aussi  c'est  la  qu'il  fait  reluire  sa  gloire  envers  nous.  Voila  pour  un  item.  Et  la  dessus  gardons  d'estre  transportez  iusques  la,  de  nous  elever  contre  la  saincte  doctrine  et  contre  la  pure  religion:  car  c'est  manifestement  despiter  Dieu,  voila  une  guerre  ouverte  contre  luy:  encores  que  nous  ne  le  prononcions  point  de  bouche,  la  chose  le  monstre.  Et  si  nous  voulons  nous  garder  d'un  tel  mal,  advisons  bien  de  ne  nous  point  iouer  avec  Dieu:  comme  il  y  a  des  rustres  qui  ne  font  que  plaisanter  quand  il  est  question  de  la  parole  de  Dieu,  ils  en  tiendront  leurs  propos  en  risee.  Or  quand  ils  sont  accoustumez  a  un  tel  mespris,  il  faut  que  Dieu  les  delaisse,  et  la  dessus  le  diable  en  prend  possession,  tellement  qu'ils  s'enveniment  et  s'enflamment  pour  blasphemer  contre  le  sainct  Esprit.  Voulons-nous  donc  que  Dieu  nous  tiene  en  bride,  tellement  que  nous  ne  tombions  point  en  cest  horrible  abysme  de  blasphemer  contre  luy,  et  de  faire  la  guerre  a  sa  verite?  Advisons  de  recevoir  la  doctrine  qu'on  nous  presche  et  que  nous  lisons,  tellement  que  ce  nous  soit  une  chose  sacree,  que  ce  nous  soit  un  thresor  inestimable.  Et  au  reste,  quand  nous  voyons  de  ces  miserables  qui  se  desbauchent  ainsi  iusques  a  despiter  Dieu,  cognoissons  que  ce  sont  les  fruicts  de  leur  hypocrisie,  quand  ils  se  sont  voulu  iouer  a  un  si  grand  maistre  comme  est  Dieu,  qu'il  faut  en  la  fin  qu'ils  trebuschent  d'une  telle  cheute  et  si  mortelle  comme  nous  le  voyons.  Et  pleust  a  Dieu  que  les  exemples  n'en  fussent  pas  si  notoires  comme  ils  sont:  mais  quand  Dieu  nous  les  monstre,  il  nous  en  faut  faire  nostre  profit,  afin  de  le  craindre  et  l'honorer  en  patience.  Et  quand  nous  voyons  de  tels  miroirs,  que  nous  en  ayons  horreur  :  et  cependant  detestons  telles  gens,  comme  sainct  Paul  dit,  Garde-toy  de  luy:  il  enseigne  Timothee  de  fuir  cest  Alexandre  comme  une  peste  mortelle.  Ainsi  donc  quand  nous  voyons  ces  malheureuses  creatures  qui  se  dressent  ainsi  contre  Dieu  et  contre  sa  Parole,  separons-nous  d'avec  eux,  craignans  d'estre  enveloppez  en  une