52:364  quod  patitur,  quia  ad  eorum  confirmationem  valeat.  Haec  invicta  est  martyrum  Christi  fortitudo,  dum  conscientia  bonae  causae,  quam  agunt,  eos  supra  mundum  attollit:  ut  non  tantum  corporis  dolores  et  cruciatus,  sed  quamvis  ignominiam  quasi  ex  alto  despiciant.  Imo  hac  cogitatione  erigere  se  debent  omnes  pii,  dum  evangelii  ministros  contumeliose  tractari  vident  ab  adversariis,  ne  propterea  minus  reverenter  de  doctrina  sentiant:  sed  dent  gloriam  Deo,  cuius  virtute  illam  erumpere  vident  per  omnia  mundi  obstacula.  Et  sane  nisi  nimium  carni  addicti  essemus,  sola  haec  consolatio  sufficere  nobis  in  persequutionibus  deberet:  quod  si  impiorum  saevitia  opprimimur,  nihilominus  propagatur  evangelium,  et  latius  se  diffundit.  Nam  quidquid  illi  moliantur,  adeo  non  obruunt  neque  exstinguunt  evangelii  lucem,  ut  clarius  emicet.  Libenter  ergo,  vel  saltem  placatis  animis  feramus,  tam  corpus  nostrum  quam  nomen  carcere  occlusum  teneri,  modo  perrumpat  Dei  veritas,  ac  longe  lateque  se  diffundat.  10.  Quamobrem  omnia  tolero.  Ab  effectu  demonstrat  quam  nihil  sit  in  suis  vinculis  probrosum,  quum  scilicet  electis  magnopere  sint  utilia.  Quod  se  propter  electos  tolerare  dicit,  hoe  argumento  est,  quanto  pluris  faciat  ecclesiae  aedificationem  quam  se  ipsum.  Neque  enim  mori  tantum,  sed  etiam  inter  scelestos  deputari  paratus  est,  ut  ecclesiae  salutem  promoveat.  Caeterum  idem  hoc  loco  docet  Paulus  quod  primo  capite  ad  Coloss,  v.  24,  ubi  dicit  se  implere,  quae  desunt  Christi  passionibus,  pro  corpore  eius,  quod  est  ecclesia.  Unde  papistarum  impudentia  abunde  refellitur,  qui  inde  colligunt  mortem  eius  fuisse  pro  peccatis  nostris  satisfactoriam.  Quasi  vero  aliud  morti  suae  arroget  Paulus,  quam  quod  piorum  fidem  sit  confirmatura.  Nam  mox  additur  expositio,  quum  salutem  fidelium  non  alibi  statuit  quam  in  Christo.  Sed  petat  plura  qui  volet  ex  eo  capite  quod  citavimus.  Gum  gloria  aeternae.  Hic  finis  est  salutis  quam  in  Christo  consequimur.  Salus  enim  nostra  est  Deo  vivere,  quae  incipit  a  regeneratione  nostra:  absolvitur  autem  plena  nostri  liberatione,  quum  nos  Deus  ex  mortalis  vitae  aerumnis  subductos  in  regnum  suum  colligit.  Ad  hanc  salutem  accedit  participatio  coelestis,  adeoque  divinae  gloriae.  Ergo  ut  Christi  gratiam  amplificaret,  nomen  aeternae  gloriae  saluti  apposuit.  11.  Fidelis  sermo.  Praefationem  adhibet  sententiae,  quam  mox  proferet,  quia  nihil  a  sensu  carnis  magis  est  alienum,  quam  moriendum  esse  ut  vivamus,  ac  mortem  esse  vitae  aditum.  Nam  ex  aliis  locis  colligere  licet,  Paulum  in  rebus  valde  seriis,  aut  creditu  minus  facilibus,  ita  praefari  solitum.  Summa  autein  est,  non  aliter  nos  vitae  et  gloriae  Christi  fore  socios,  nisi  prius  cum  eo  mortui