32:364  Priusquam  vero  ad  recitationem  operum  Dei  veniat  propheta,  summam  eius  deitatem  summumque  imperium  commendat,  non  quod  proprie  loquendo  extra  ipsum  ulla  sit  deitatis  scintilla:  sed  quia  homines  ubicunque  partem  aliquam  gloriae  eius  conspiciunt,  deitatem  aliquam  seorsum  imaginantur,  Deumque  ipsum  perperam  distrahunt  in  partes:  neque  hoc  errore  contenti,  deos  sibi  ligneos  et  lapideos  confingunt.  Denique  omnibus  ingenita  est  haec  pravitas,  ut  se  deorum  varietate  et  turba  oblectent.  Ideo  propheta  consulto  videtur  non  modo  in  voce  DVOX  pluralem  numerum  usurpasse,  sed  etiam  in  voce  D^iiiX*  ^*c  en*m  egt  ad  verbum,  Laudate  Dominos  dominorum,  ac  si  diceret  perfectam  omnis  dominii  plenitudinem  in  uno  Deo  inveniri.  4.  (Qui  fecit  mirabilia.)  Hoc  nomine  insignit  omnia  Dei  opera  a  minimo  usque  ad  maximum:  quo  nos  in  eorum  admirationem  expergefaciat,  quia  propter  socordiam  nostram  vilescunt:  quum  tamen  singulis  insculptae  sint  insignes  notae  incredibilis  tam  sapientiae  quam  virtutis  Dei.  Deum  autem  fecisse  et  facere  solum  quidquid  admiratione  dignum  est,  asserit:  ut  discamus  non  posse  vel  minimam  laudis  eius  guttam  alio  transferri  absque  intolerabili  sacrilegio:  quia  ubi  lustraverimus  coelum  et  terram,  nusquam  reperiemus  ullum  deitatis  specimen,  ut  ei  socium  vel  aemulum  adiungere  liceat.  Postea  Dei  sapientiam  celebrat  in  una  specie,  quod  scilicet  tanto  artificio  compositi  sint  coeli,  ut  clamitent  mirabiliter  se  tam  pulcra  distinctione  fuisse  ornatos.  Inde  ad  terram  descendit:  ut  discamus  hoc  quoque  praeclarum  et  memorabile  Dei  opus  magni  facere,  quia  nudam  et  siccam  terrae  superficiem  expandat  super  aquas.  Nam  quum  elementis  sphaerica  sit  forma,  naturaliter  aquae  terram  obtegerent,  nisi  cohiberentur  suis  claustris:  quia  Deus  hospitium  concedere  voluit  humano  generi:  atque  hoc  inter  sua  principia  ponere  coguntur  philosophi.  Ergo  terrae  expansio,  et  vacuum  hoc  spatium  quod  aquis  non  obruitur,  merito  censetur  inter  praecipua  Dei  miracula.  Et  simul  Dei  gratiae  adscribitur:  quia  nulla  erat  ratio  cur  aquas  a  suo  situ  depelleret,  nisi  quia  pro  immensa  sua  bonitate  hominibus  consultum  esse  voluit.  7.  (Qui  fecit  luminaria.)  Quum  Moses  duo  luminaria  magna  vocet,  solem  et  lunam,  non  dubito  quin  hanc  loquendi  rationem  sequutus  sit  propheta.  Ideo  quod  paulo  post  adiungit  de  stellis,  quasi  accessorium  est.  Etsi  autem  lunam  alii  planetae  magnitudine  superant,  non  abs  re  tamen  vocatur  secundum  luminare  manifesti  effectus  causa.  Neque  enim  spiritus  sancti  consilium  fuit  astrologiam  docere:  sed  quum  doctrinam  proponeret  rudissimis  quibusque  idiotis  communem,  populariter  loquutus  est  per  Mosen,  et  prophetas,  ne  quis  praetextu  difficultatis  subterfugeret,  sicuti  videmus  nihil  cupidius