25:364  quae  Aristoteles  tradit  de  aquilis,  huc  accommodare  per  me  licebit:  quanquam  non  existimo  aliud  venisse  Mosi  in  mentem  quam  quod  verba  prae  se  ferunt.  Et  certe  sufficere  nobis  debet  quod  in  promptu  nobis  occurrit,  hac  inaestimabili  Dei  bonitate  et  indulgentia  merito  nos  debere  in  admirationem  rapi,  dum  se  eousque  submittere  non  gravatur  ut  instar  aviculae  suis  alis  nos  protegat,  et  volitando  nos  ad  se  sequendum  formet,  atque  assuefaciat:  qua  secunda  parte  plus  quam  materna  educatio  notatur.  12.  Iehova  solus  deduxit  eum.  Anticipatio  est,  qua  omnes  tergiversandi  praetextus  adimit:  si  forte  vellent  Israelitae,  pro  more  suas  superstitiones  miscere  cum  simplici  Dei  cultu.  Nam  quum  hinc  inde  varios  deos  sibi  accerserent,  passim  audita  fuit  illa  excusatio,  non  ita  exspoliari  Deum  suo  iure.  Atque  hinc  factum  est  ut  sibi  permiserint  coacervare  falsorum  deorum  turbam,  quos  pro  patronis  colebant.  Atqui  occurrit  Moses,  ac  pronunciat,  Deum  sicuti  alieno  auxilio  non  indiget,  exteros  deos  non  adhibuisse  socios  in  servando  populo.  Unde  sequitur,  quoscunque  deos  admisit  populus,  in  eos  transtulisse  veri  et  unius  Dei  honorem.  Discamus  itaque  ex  hoc  loco  nisi  in  solidum  colatur  Deus,  impia  corruptela  totam  religionem  perverti.  13.  Equitare  fecit.  Quod  Iudaeam  sic  vocari  fingunt,  quia  sit  terrae  umbilicus,  frivolum  est:  melius  convenit  excelsam  dici  Aegypti  respectu  et  satis  trita  est  loquendi  ratio,  eos  qui  in  Aegyptum  proficiscuntur  descendere:  et  rursus  ascendere  eos  qui  in  Iudaeam  veniunt.  Quanquam  mihi  probabile  est,  celsitudine  notari  excellentiam:  quia  terra  illa  ob  praeclaras  dotes  esset  quasi  nobilissimum  totius  orbis  theatrum.  Foecunditatem  amplificat  Moses,  ubi  dicit  populum  suxisse  mel  e  petra,  et  oleum  ex  lapidibus:  significat  enim  nullam  partem  fuisse  sterilem,  quum  ex  rupibus  mel  colligerent,  et  illic  etiam  oleae  nascerentur.  Eodem  spectant  aliae  figurae,  comedisse  butyrum  ex  vaccis,  et  lac  ex  ovibus:  quibus  significat,  terram  illam  opimis  pascuis  fuisse  divitem.  Per  adipem  agnorum,  haud  dubie  carnem  bene  saginatam  significat:  quia  fas  non  fuisset  adipe  vesci.  Sed  novum  non  est  hac  voce  notari  quamlibet  pinguedinem,  sicuti  paulo  post  adipem  tritici  nominat  optimam  similaginem  vel  farinam,  ex  qua  fiebat  panis  delicatior.  In  vino  autem  non  sine  poetico  schemate  Dei  liberalitatem  commendat,  ubi  dicit:  Sanguinem  uvarum  eos  bibisse.  Dubium  quidem  non  est  quin  ad  colorem  alludat,  sed  hac  occasione  Dei  beneficentiam  splendidius  extollit,  dum  exprimitur  uvarum  succus  ac  si  sanguis  proflueret  ad  homines  alendos.  Quoniam  autem  a  vini  rubedine  sumpta  est  metaphora,  epitheton  lion  in  fine  versus  non  dubitavi  transferre