55:363  363  EPIST.  IOHANNIS  364  pondent.  Interea  admonet  apostolus,  pugnandum  esse  ut  serviamus  Domino,  totus  enim  mundus  nobis  obsistit,  ne  pergamus  quo  Deus  vocat.  Ergo  ille  demum  legem  servabit,  qui  mundo  fortiter  resistet.  4.  Haec  est  victoria.  Quia  dixerat,  omnes  qui  ex  Deo  geniti  sunt,  mundi  victores  esse:  vincendi  quoque  modum  exprimit.  Poterat  enim  adhuc  quaeri,  unde  victoria:  ergo  in  fide  constituit  victoriam  totius  mundi.  Insignis  locus:  quia  tametsi  duros  et  horribiles  insultus  assidue  ingerit  Satan:  spiritus  Dei  extra  periculum  nos  esse  pronuntians,  exempto  metu  nos  ad  fortiter  pugnandum  animat.  Et  plus  valet  praeteritum  tempus  quam  praesens  vel  futurum.  Vicisse  enim  dicit,  ut  perinde  certi  simus,  ac  si  iam  profligatus  esset  hostis.  Verum  quidem  est  tota  vita  durare  nostram  militiam,  quotidianos  esse  conflictus  :  imo  singulis  momentis  nova  et  diversa  proelia  hinc  inde  ab  hoste  nobis  moveri:  sed  quia  non  armat  nos  Deus  tantum  in  unum  diem,  et  fides  etiam  unius  diei  non  est,  sed  perpetuum  spiritus  sancti  opus:  non  aliter  iam  victoriae  sumus  compotes,  quam  si  esset  debellatum.  Neque  tamen  fiducia  haec  torporem  inducit,  quin  sollicite  semper  ad  pugnam  simus  intenti.  Sic  enim  certos  esse  Dominus  suos  iubet,  ut  tamen  securos  esse  nolit:  quin  potius  ideo  vicisse  ipsos  pronuntiat,  quo  animosius  et  magis  strenue  pugnent.  Mundi  nomen  hic  late  patet:  comprehendit  enim  quidquid  adversum  est  Dei  spiritui  :  ita  naturae  nostrae  pravitas  pars  mundi  est,  omnes  concupiscentiae,  omnes  Satanae  astus,  quidquid  denique  nos  a  Deo  abstrahit*  In  tam  multiplici  hominum  copia,  gravis  belli  moles  in  nos  incumbit:  ac  iam  ante  congressum  essemus  victi,  ac  centies  quotidie  vincendi,  nisi  Dens  victoriam  nobis  promitteret.  Sed  Deus  hac  lege  ad  pugnandum  nos  hortatur,  ut  prius  victoriam  promittat.  Caeterum  ut  haec  promissio  nos  invicta  Dei  virtute  in  perpetuum  munit,  ita  ex  adverso  in  nihilum  redigit  hominum  vires.  Neque  enim  hic  apostolus  Deum  suppetias  tantum  nobis  ferre  docet,  ut  eius  subsidio  adiuti,  pares  simus  ad  resistendum:  sed  victoriam  in  sola  fide  locat:  fides  autem  aliunde  quo  vincat,  accipit.  Quare  Deo  eripiunt  quod  suum  est,  qui  propriae  virtuti  triumphum  canunt.  5.  Quis  est  qui  vincit  mundum?  Ratio  superioris  sententiae  :  ideo  scilicet  nos  fide  vincere,  quia  robur  a  Christo  mutuamur:  quemadmodum  et  Paulus  dicit  (Philip.  4,  13):  Omnia  possum  in  eo  qui  me  confirmat.  Is  ergo  demum  Satana  et  mundo  superior  erit,  nec  carni  suae  succumbet  qui  sibi  diffidens,  recumbet  in  solam  Christi  virtutem.  Nam  fidei  nomine,  vivam  Christi  apprehensionem  intelligit,  quae  vim  eius  et  officium  ad  nos  accommodat.