55:362  postea  vires  suas  impares  experti,  pigrescunt:  ergo  Iohannes,  ut  conatus  nostros  incitet,  mandata  Dei  gravia  esse  negat.  Verum  obiici  contra  potest,  nos  longe  aliud  experiti:  et  scriptura  etiam  testatur  iugum  legis  esse  importabile  (Act.  15,  10).  Ratio  quoque  manifesta  est:  nam  quum  nostri  abnegatio  sit  quasi  servandae  legis  praeludium,  an  facile  homini  esse  dicemus,  se  ipsum  negare?  Imo  quum  lex  spiritualis  sit  (quemadmodum  Paulus  docet  [Rom.  7,  14]),  nos  autem  nihil  quam  caro,  ingens  inter  nos  et  Dei  legem  dissidium  esse  oportet.  Respondeo,  difficultatem  hanc  minime  esse  ex  natura  legis,  sed  ex  carnis  nostrae  vitio.  Quod  etiam  Paulus  diserte  exprimit:  quia  postquam  dixit,  impossibile  fuisse  legi  conferre  nobis  iustitiam:  mox  culpam  in  carnem  reiicit.  Haec  solutio  Pauli  et  Davidis  sententias,  quae  in  speciem  videntur  multum  pugnare,  optime  conciliat  Paulus  legem  facit  mortis  ministram  (2.  Corin.  3,  7),  nihil  quam  iram  Dei  operari  pronuntiat:  datam  esse  ut  peccatum  augeret:  vivere  ut  nos  occidat.  David  contra,  suavem  prae  melle,  et  prae  auro  desiderabilem  sibi  esse  praedicat  (Psal.  19,  l  l  )  .  Inter  alia  eius  elogia,  haec  ponit,  Quod  exhilaret  corda,  ad  Dominum  convertat,  et  vivificet.  Sed  Paulus  legem  cum  vitiosa  hominis  natura  confert:  inde  hostilis  ille  conflictus.  David  autem,  qualiter  affecti  sint,  quos  Deus  spiritu  suo  regenuit,  docet.  Hinc  suavitas  illa  et  oblectatio,  cuius  nullum  gustum  caro  percipit.  Nec  vero  Iohannes  distinctionem  hanc  omisit:  ne  quis  enim  generaliter  hoc  acciperet,  praecepta  Dei  non  esse  gravia,  restringit  ad  filios  Dei:  quo  significat,  fieri  hoc  spiritus  virtute,  ut  Deo  obsequi  non  sit  nobis  grave  nec  molestum.  Nondum  tamen  videtur  prorsus  soluta  quaestio.  Nam  fideles  utcunque  spiritu  Dei  regantur,  durum  tamen  cum  carne  sua  certamen  sustinent:  et  quantumvis  sudent,  vix  tamen  dimidia  ex  parte  ad  officium  se  comparant  :  imo  quasi  inter  sacrum  (ut  aiunt)  et  saxum  constituti,  fere  sub  onere  deficiunt.  Videmus  ut  Paulus  se  captivum  teneri  gemat,  et  infelicem  exclamet,  quia  non  potest  libere  Deo  servire.  Respondeo,  facilem  vocari  legem,  quatenus  coelesti  virtute  praediti,  superamus  carnis  concupiscentias.  Nam  utcunque  recalcitret  caro:  sentiunt  tamen  fideles:  nulla  se  alia  re  tam  oblectari,  quam  ut  Deum  sequantur.  Praeterea  notandum  est,  Iohannem  non  loqui  de  nuda  lege,  quae  nihil  praeter  mandata  continet:  sed  paternam  Dei  indulgentiam  coniungere,  qua  mitigatur  legis  rigor.  Ergo  quum  nobis  clementer  ignosci  a  Domino  scimus,  si  opera  nostra  legi  non  satisfaciant,  id  longe  nos  reddit  ad  obsequium  promptiores:  quemadmodum  in  Psalmo  130,  4,  habetur:  Apud  te  est  propitiatio,  ut  timearis.  Hinc  ergo  facilitas  legis  servandae,  quod  fideles  venia  sublevati,  sicubi  deficiunt,  animos  non  des-