54:362  contre  Dieu,  qu'on  desguise  et  qu'on  falsifie  sa  verite,  que  si  on  nous  faisoit  tous  les  outrages,  et  toutes  les  violences  qu'il  est  possible  de  penser.  Et  de  faict,  si  la  verite  de  Dieu  ne  nous  est  precieuse  iusques  la,  ou  sera  nostre  zele?  Ce  qui  est  escrit  au  Pseaume,  combien  qu'il  ait  este  accompli  en  la  personne  de  nostre  Seigneur  Iesus  Christ,  sainct  Paul  l'applique  a  tous  fideles:  c'est  que  quand  ils  oyent  que  l'honneur  de  Dieu  est  vilipende,  qu'ils  doyvent  prendre  cela  a  eux,  et  qu'ils  doyvent  avoir  un  zele  qui  leur  ronge  le  coeur,  et  qui  les  devore  du  tout,  qu'ils  n'ayent  nul  repos  en  eux.  Si  nous  n'avons  cela,  nous  monstrons  que  nous  n'avons  nul  zele  ni  amour  a  nostre  Dieu:  et  pourtant  que  nous  ne  sommes  pas  dignes  d'estre  reputez  ses  enfans.  Car  qui  est  celuy  qui  souffrira  qu'on  se  mocque  de  son  pere?  et  toutesfois  c'est  une  creature  terrienne,  et  de  nulle  valeur.  Qui  osera  donc  se  vanter  d'estre  enfant  de  Dieu,  et  cependant  il  ne  luy  chaudra  que  le  nom  de  Dieu  soit  en  mocquerie,  que  sa  verite  soit  la  exposee  a  tous  blasphemes?  Voila  ce  que  nous  avons  a  retenir:  que  si  on  s'eleve  contre  Dieu,  et  contre  la  pure  doctrine  de  l'Evangile,  que  nous  devons  estre  plus  faschez  et  tourmentez  de  cela,  que  si  on  nous  faisoit  tous  les  opprobres  et  outrages  qu'il  est  possible  a  nos  personnes.  Et  voila  pourquoy  aussi  sainct  Paul  dit  qu'Isaac  a  este  persecute  par  Ismael.  Il  n'est  point  question  qu'Ismael  ait  batu  ni  frappe  son  frere  Isaac,  ne  qu'il  l'ait  desherite  de  son  heritage,  qu'il  l'ait  dechasse  par  force  de  la  maison  :  mais  qu'il  s'est  mocque.  Voila  seulement  un  petit  mot  de  risee,  et  sainct  Paul  l'appelle  persecution.  Et  pourquoy?  Or  c'est  la  ou  il  nous  faut  estre  enflammez.  Quand  nous  voyons  que  la  maieste  de  Dieu  est  vilipendee  par  les  hommes,  quand  nous  voyons  des  vermines,  des  charongnes  qui  prenent  ceste  audace  de  s'elever  contre  leur  Createur,  quand  nous  voyons  que  la  doctrine  qui  doit  estre  comme  le  sceptre  royal  par  lequel  Dieu  exerce  son  Empire  sur  tout  le  monde,  et  aussi  en  laquelle  consiste  nostre  salut,  est  convertie  ainsi  en  l'opprobre  des  hommes,  faut-il  que  nous  le  souffrions  sans  monstrer  aucune  tristesse  et  angoisse  en  nous  ?  C'est  ce  que  nous  avons  a  retenir  en  brief  de  ce  passage,  quand  sainct  Paul  pour  toute  complainte  des  maux  qu'il  a  endurez  de  ce  forgeron,  dit,  II  a  resiste  a  mes  propos.  Il  n'allegue^  pas  ici  qu'il  ait  endure  aucune  peine  pour  soy,  mais  pource  qu'il  a  veu  qu'il  bataiiloit  contre  la  verite.  Or  venons  maintenant  a  la  priere  que  sainct  Paul  fait  contre  luy.  Qu'il  luy  soit  rendu  (dit-il)  selon  qu'il  Va  desservi.  Nous  avons  desia  declare  que  sainct  Paul  n'a  point  este  esmeu  de  cholere,  et  d'une  impetuosite  contre  ce  forgeron:  mais  que  ce  zele-ci  a