47:362  sunt.  Huic  doctrinae  quisquis  aliquid  addendum  putat,  ac  si  mutila  esset  et  semiplena,  non  modo  apostolos  insimulat  malae  fidei,  sed  in  spiritum  blasphemus  est.  Si  doctrina,  quam  literis  consignarunt,  a  tironibus  adhuc  et  novitiis  profecta  esset,  non  supervacua  esset  accessio:  nunc  vero  quum  eorum  scripta  quasi  perpetuae  sint  eius  revelationis  tabulae,  quae  illis  promissa  et  praestita  fuit,  non  potest  sine  atroci  spiritus  iniuria  quidquam  illis  addi.  Porro  quum  ad  res  ipsas  ventum  est,  plus  quam  ridiculi  sunt  papistae:  illa  enim  arcana,  quibus  portandis  impares  erant  apostoli,  pueriles  esse  naenias  definiunt,  quibus  nihil  inanius  vel  magis  fatuum.  Descendere  scilicet  e  coelo  spiritum  oportuit  ut  discerent  apostoli,  quo  ritu  sacrandi  esseni  calices  cum  suis  altaribus,  baptizandae  campanae,  benedicenda  aqua  lustralis,  et  missa  celebranda.  Unde  igitur  discunt  moriones  et  pueri,  qui  ad  unguem  tenent  haec  omnia?  Nihil  itaque  apertius  est  quam  Deo  illudere  papistas,  quum  e  coelo  prodiisse  fingunt,  quae  tam  Cereris  aut  Proserpinae  mysteria  sapiunt,  quam  abhorrent  a  sincera  spiritus  sapientia.  Nos  vero  nisi  velimus  ingrati  esse  Deo,  acquiescamus  in  ea  doctrina,  cuius  autores  esse  apostolos  scripta  eorum  testantur,  quando  summa  illic  coelestis  sapientiae  perfectio  nobis  prodita  est,  quae  hominem  Dei  perfectum  reddat  (2.  Tim.  3,  17):  ultra  eam  progredi  fas  esse  non  putemus.  Nam  altitudo  nostra  et  latitudo  et  profunditas  in  eo  posita  est,  ut  sciamus  caritatem  Dei  quae  nobis  exhibita  est  in  Christo.  Haec  cognitio  omnem  scientiam  supereminet,  ut  inquit  Paulus  (Eph.  3,  18):  ut  quum  tradit  in  Christo  absconditos  esse  omnes  sapientiae  et  scientiae  thesauros  (Col.  2,  3),  non  aliquem  ignotum  Christum  fabricat,  sed  quem  sua  praedicatione  ad  vivum  depinxit,  ut  cernatur  quasi  ante  oculos  nostros  crucifixus,  quemadmodum  dicit  ad  Gal.  3,  1.  Caeterum  ne  qua  maneat  ambiguitas,  Christus  ipse  postea  suis  verbis  explicat,  quaenam  illa  sint,  quae  nondum  ferre  poterant  apostoli.  Quae  ventura  'sunt,  annuntiabit  vobis,  inquit.  Hoc  quidem  nonnulli  ad  spiritum  prophetiae  restringunt,  sed  meo  iudicio  potius  futurum  regni  sui  spiritualis  statum  designat,  qualem  paulo  post  resurrectionem  eius  apostoli  viderunt,  sed  tunc  comprehendere  nullo  modo  poterant.  Non  ergo  vaticinia  illis  promittit  de  rebus  post  eorum  mortem  futuris,  sed  tantum  significat  aliam  fore  regni  sui  naturam,  et  gloriam  longe  maiorem  quam  nunc  animis  concipere  possint:  cuius  arcanae  sapientiae,  quam  per  ecclesiam  coelestes  quoque  angeli  cum  admiratione  discunt  (Eph.  3,  10),  thesauros  Paulus  explicat  in  epistola  ad  Ephesios  a  primo  capite  usque  ad  finem  quarti.  Quare  non  est  quod  a  papae  archivis  vel  scriniis  petatur.  Non  enim  loquetur  a  semetipso.  Confirmatio  est  illius  particulae,  Ducet  vos  in  omnem  veritatem.