54:361  361  SUR  LA  SECONDE  A  TIMOTHEE.  362  advenu  du  temps  de  S.  Paul.  Toutesfois  nous  avons  a  nous  consoler,  que  Dieu  en  laschant  ainsi  la  bride  a  Satan,  donne  tousiours  victoire  a  sa  verite  en  la  fin:  et  non  seulement  contre  ces  ignorans  qui  n'ont  qu'une  audace  effrontee,  mais  contre  les  plus  subtils  docteurs  qui  soyent  au  monde.  Ayons  donc  la  verite  de  nostre  part,  invoquons  Dieu,  et  cheminons  en  simplicite,  et  ne  doutons  point  que  nous  ne  demeurions  tousiours  victorieux  contre  nos  ennemis.  Il  est  vray  que  ce  ne  sera  pas  sans  estre  faschez  et  tourmentez:  car  ce  n'est  point  sans  cause  que  sainct  Paul  dit  que  cest  Alexandre  forgeron  luy  a  monstre  beaucoup  de  mal,  car  voila  le  mot  dont  il  use:  mais  c'est  a  la  facon  commune  de  parler  de  son  langage,  qui  vaut  autant  comme  s'il  disoit,  II  m'a  fait  beaucoup  de  mal.  S.  Paul  donc  combien  qu'il  fust  soustenu  de  la  vertu  du  sainct  Esprit,  combien  qu'en  un  mot  il  peust  rembarrer  tous  les  meschans  qui  resistoyent  a  la  verite,  n'a  pas  laisse  toutesfois  d'estre  fort  empesche  en  ce  combat.  Et  pourquoy?  Dieu  Fa  voulu  ainsi  humilier.  Ainsi  donc,  combien  que  les  meschans  ayent  quelques  fois  la  vogue,  et  qu'on  leur  applaudis8e,  et  qu'il  semble  que  nous  devions  estre  opprimez,  ne  nous  estonnons  point  pour  cela,  scachans  bien  que  sainct  Paul  ne  se  plaind  pas  sans  cause,  qu'il  a  soustenu  beaucoup  de  mal  par  un  forgeron.  Comme  auiourd'huy,  quand  il  y  aura  quelque  rustre  qui  s'elevera  contre  la  pure  doctrine  de  l'Evangile,  il  aura  une  longue  queue  apres,  et  grande  sequelle.  Et  pourquoy?  Car  combien  que  tous  facent  profession  de  l'Evangile,  tant  y  a  qu'a  grand'peine  en  trouvera-on  de  dix  l'un,  qui  ne  demande  sinon  que  les  choses  soyent  confuses,  qu'on  ne  sceust  qui  l'a  gagne  ou  perdu.  Et  pourquoy?  Car  il  leur  semble  qu'alors  ils  auroyent  licence  de  mener  une  vie  dissolue,  et  de  se  mocquer  pleinement  de  Dieu.  D'autant  donc  que  la  religion  est  comme  une  bride  pour  retenir  les  hommes,  pource  qu'ils  seroyent  comme  bestes  sauvages,  voila  comme  beaucoup  de  gens  aiment  les  combats,  et  les  disputes,  et  tousiours  les  plus  meschans  remportent.  Mais  quand  nous  voyons  cela  (comme  i'ay  dit),  portons-le  patiemment,  et  ne  doutons  pas  que  Dieu  ne  donne  telle  issue  comme  sainct  Paul  l'a  experimentee.  Car  en  sa  personne  nous  avons  un  tesmoignage  comme  Dieu  gouverne  tousiours  les  siens,  et  qu'il  leur  donne  la  victoire,  combien  que  pour  un  temps  il  les  travaille.  Or  il  y  a  cependant  a  noter  que  sainct  Paul  ne  se  plaind  point  qu'Alexandre  forgeron  luy  ait  fait  beaucoup  de  mal  en  sa  personne,  qu'il  ait  pourchasse  sa  mort,  qu'il  luy  ait  dit  des  iniures:  mais  il  dit  qu'il  a  resiste  a  sa  doctrine.  Notons  donc,  si  nous  sommes  enfans  de  Dieu,  que  ceci  nous  doit  plus  navrer  le  coeur,  et  nous  apporter  plus  grande  tristesse,  quand  nous  voyons  qu'on  blaspheme