25:361  361  REDITUS  AD  HISTORIAM.  362  haud  dubie  praerogativam  commendat,  qua  Deus  filios  Abrahae  insigniverat  prae  cunctis  gentibus.  Nam  quia  lapsus  Adae  deformitatem  omnibus  posteris  induxit,  reformat  Deus  quos  segregat  sibi  in  peculium,  ut  melior  sit  eorum  quam  omnium  gentium  conditio.  Simul  tamen  notandum  est,  hanc  renovationis  gratiam  deleri  in  multis,  qui  deinde  profanescunt.  Unde  sequitur  bifariam  vocari  ecclesiam  Dei  opus  et  figmentum  :  nempe  generaliter  externa  vocatione,  et  specialiter  regeneratione  spirituali,  quoad  electos:  foedus  enim  gratiae  hypocritis  et  fidelibus  commune  est.  Et  hac  ratione  dicuntur  promiscue  omnes  quos  Deus  in  ecclesiam  suam  colligit,  refingi  ac  regenerari:  sed  interior  novatio  nonnisi  ad  solos  fideles  pertinet:  quos  ideo  Paulus  vocat  opus  Dei,  creatos  ad  bona  opera  quae  Deus  praeparavit  (Eph.  2,  10).  Eodem  tendit  tertium  verbum:  quod  tamen  pro  Stabilire  potest  accipi:  quanquam  sensum  magis  receptum  sequi  malui:  nempe  quod  Deus  populum  aptaverit,  quemadmodum  artifex  opus  suum  concinnat.  7.  Memento  dierum  saeculi.  Est  expositio  proximi  versus:  iterum  enim  docet  Moses  quomodo  Deus  sibi  acquisierit  populum:  nempe  quia  pro  suo  beneplacito  separare  eum  voluit  a  reliquis  gentibus.  Quoniam  autem  praesenti  sua  excellentia  turgere  poterant  Israelitae,  revocantur  ad  suam  originem:  ac  iubet  eos  Moses  non  tantum  respicere  quales  nunc  sint,  sed  unde  fuerint  sumpti  :  hoc  sensu  dicit  :  Memento  ultimae  vetustatis,  interroga  senes,  ete.  Scimus  enim  ubi  non  reputant  homines  quidquid  habent  profectum  esse  a  Deo,  et  esse  veluti  precarium,  suo  splendore  excaecari,  ut  non  tantum  alios  despiciant,  sed  cornua  quoque  attollant  adversus  bonorum  omnium  autorem.  Ut  hanc  arrogantiam  Moses  subigat,  dicit  populos  omnes  fuisse  pariter  sub  manu  et  imperio  Dei:  atque  ita  discrimen  non  fuisse  in  eorum  natura  ab  initio  :  sed  aliunde  fluxisse,  nempe  a  libero  Dei  arbitrio.  In  verbo  ^rttsO  nonnulla  est  ambiguitas.  Quidam  enim  vertunt:  Quum  divideret  Excelsus  terram  populis:  quod  tametsi  non  repudio,  amplexus  tamen  sum  quod  contextui  erat  aptius  :  bis  enim  idem  dicit  Moses,  et  secundum  membrum  explicatio  est  superioris.  Dicit  ergo  Deum  populos  distribuisse,  quemadmodum  haereditatis  fit  partitio  :  deinde  id  clarius  repetitur  per  separationem  filiorum  Adam.  Quod  in  secundo  membro  dicitur  constituisse  terminos  gentium  pro  numero  filiorum  Israel,  vulgo  sic  exponunt,  limites  ita  praescriptos  fuisse  gentibus,  ut  salva  maneret  filiis  Abrahae  sua  habitatio.  Quidam  ex  Hebraeis  arctius  sumunt,  in  regionum  distributione  septem  gentibus  Chananaeis  tantum  fuisse  datum  quantum  filiis  Israel  sufficeret.  Ego  vero  alium  sensum  esse  arbitror,  nempe  in  tota  mundi  ordinatione  finem  hunc  fuisse  Deo  propositum,  ut  electo  populo  consuleret.  Etsi