41:360  et  chastes  en  toute  nostre  vie.  Voions  nous  qu'il  ait  puni  les  larcins,  les  iniures,  les  outrages,  et  toutes  cruautes?  advisons  de  cheminer  en  droiture  avec  nos  prochains,  de  ne  nuire  a  personne,  de  ne  procurer  point  nostre  profit,  au  dommage  de  ceux  ausquels  nous  devons  plustost  aider:  Voila  donc,  comme  il  nous  faut  pratiquer  les  histoires  de  l'escriture  saincte,  pour  les  appliquer  a  nostre  usage,  et  non  seulement  celles  la,  mais  quant  nous  orrons  parler  des  histoires  prophanes,  encores  que  ceux  qui  les  ont  escrites  n'aient  point  conneu  Dieu,  si  faut-il  que  nous  en  facions  nostre  profit,  car  Dieu  ha  fait  le  tout  a  nostre  instruction,  et  ainsi  il  faut  que  ceci  nous  vienne  en  memoire,  qui  est  recite  par  Daniel,  que  connoissans  ces  choses,  nous  ne  soyons  point  endurcis  a  l'encontre  de  nostre  Dieu,  si  tost  qu'il  sera  avenu  quelque  chose  de  nostre  temps,  que  nous  y  pensions,  que  nous  ne  facions  point  comme  ces  canailles  qui  voudroient  qu'on  ensevelist  les  iugemens  de  Dieu.  Voila  Dieu,  qui  aura  puni  un  homme  en  telle  sorte,  qu'il  faudra  que  nous  connoissions  que  la  main  de  Dieu  aura  este  la:  et  ces  canailles  voudront  empescher  qu'on  ne  regarde  point  a  un  tel  iugement  de  Dieu,  mais  quoy?  le  diable  transporte  ces  malheureux  icy,  car  il  leur  semble  que  c'est  un  grand  deshonneur  a  un  pays,  ou  a  une  ville,  quand  il  y  sera  ainsi  advenu  quelque  chose  notable,  quand  on  dira  que  le  diable  aura  emporte  un  homme,  o  il  n'en  faut  point  parler,  voire,  et  les  iugemens  de  Dieu  seront  ensevelis  par  ce  moien,  et  ces  brouillons  icy,  oui  ces  diables  encharnes  voudront  qu'on  cache  tout  cela,  a  fin  qu'ils  n'aient  point  d'occasion  (ce  leur  semble)  de  penser  de  plus  pres  aux  iugemens  de  Dieu,  car  ils  ont  accoustume  de  mettre  tout  soubs  le  pied  :  a  fin  que  cela  ne  les  empesche  de  s'esgayer,  et  de  se  resiouir  a  leur  mode,  c'est  a  dire,  en  toutes  dissolutions  et  intemperances.  Or  quant  a  nous,  il  nous  faut  regarder  aux  iugemens  de  Dieu,  et  sur  tout,  quant  ils  auront  este  faicts  en  nostre  temps,  soit  en  nos  personnes,  ou  en  la  personne  de  nos  parens,  et  de  nos  prochains,  et  que  nul  ne  presume  de  s'excuser  en  cecy,  pour  grandeur  ou  hautesse  qui  soit  en  luy,  ou  en  son  lignage.  Balsazar  pouvoit  bien  estre  excuse,  car  il  estoit  un  grand  Roy,  voire,  qui  n'avoit  point  son  pareil  en  tout  le  monde,  et  toutesfois  nous  voyons  qu'il  est  condamne  de  Dieu,  de  ce  qu'il  ne  s'est  point  humilie,  et  qu'il  n'ha  point  pense  a  la  punition  de  son  grand  Pere.  Or  si  nous  devons  penser  aux  chastiemens  que  Dieu  envoye  a  ceux  cy,  et  a  ceux  la,  quant  il  nous  punist  de  sa  main,  ie  vous  prie  devons-nous  estre  endormis?  Quant  il  m'aura  frappes  faut-il  que  du  iour  au  lendemain  ie  n'y  pense  plus?  non  seulement  il  m'aura  auiourd'huy  donne  un  coup,  mais  il  redoublera  quant  il  verra  que  ie  seray