25:360  filii  quam  ipsius  Dei  vocantur:  cuius  rei  paulo  post  exemplum  occurret.  Verum  ut  temere  gloriari  desinant,  dicuntur  non  esse  filii,  quia  sint  degeneres:  ideoque  divinitus  abdicati,  ne  gradum  honoris  amplius  retineant.  Hoc  sensu  negat  Moses  esse  filios  qui  Deum  patrem  abnegaverant.  Additur  id  esse  factum  ipsorum  macula:  nisi  magis  placeat  legere  corruptos  fuisse  suis  maculis,  ut  ita  macula  pro  vitio  sumatur:  quod  libenter  amplector,  quanquam  diversum  sensum  non  reiicio,  nempe  cessisse  illis  alienationem  a  Deo  in  ignominiam,  vel  maculam  dedecoris  sua  perfidia  contraxisse.  6.  Iehovae  retribuetis  istud.  Iam  quo  populi  ingratitudinem  magis  ignominiose  traducat,  beneficia  quibus  eum  Deus  sibi  obstrinxerat  commemorare  incipit.  Nam  quo  liberalius  nobiscum  agit  Deus,  eo  magis  accendi  decet  pietatis  studium  in  cordibus  nostris:  imo  eius  bonitas,  simulac  percipimus  eius  gustum,  nos  ad  se  rapere  debebat.  Deus  autem  quum  semper  beneficus  fuerit  erga  totum  humanum  genus,  immensam  suae  largitatis  copiam  in  populum  illum  singulari  modo  profuderat:  hac  igitur  in  medium  proposita,  ostendit  Moses  quam  turpiter  ingratus  fuerit  populus.  Primo  interrogative  expostulat  an  respondeat  ista  merces  insignibus  Dei  beneficiis:  deinde  ad  ipsam  recitationem  descendit.  Quaerit  ergo  an  Deus  non  fuerit  eorum  pater  ex  quo  adoptionis  honore  eos  dignatus  fuerat:  sub  quo  uno  capite  multa  comprehendit:  quia  ex  hoc  fonte  manabat  quidquid  beneficiorum  in  eos  contulerat  Deus.  Verum  ut  singula  pro  merito  non  expendantur,  quae  potest  sanctior  fingi  obligatio  quam  ut  Deus  gentem  unam  ex  toto  orbe  sibi  delegerit,  cuius  pater  esset  singulari  privilegio?  Nam  etsi  interdum  cuncti  mortales  (quoniam  ad  Dei  imaginem  formati  sunt)  vocantur  eius  filii,  peculiare  hoc  tamen  fuit  Abrahae  filiis  censeri  eius  filios.  Atque  ut  probet  Moses  non  esse  naturae  hanc  dignitatem,  sed  adventitiam:  quomodo  illis  fuerit  Deus  pater,  continuo  post  exprimit:  nempe  quatenus  ipsos  acquisivit,  fecit  et  praeparavit.  Ergo  principium  et  origo  fuit  gratuitum  Dei  beneplacitum,  ubi  eos  sibi  in  peculium  sumpsit.  Alibi  quidem  secunda  acquisitio  ponitur,  ubi  eos  redemit  ex  Aegypto  :  hic  vero  altius  conscendit  Moses,  nempe  ad  foedus  cum  Abraham  percussum,  quo  segregati  fuerunt  a  reliquis  gentibus,  ut  paulo  post  clarius  patebit.  Quod  verbum  nyp  quidam  vertunt  Possidere,  repudio  tanquam  a  contextu  alienum.  Iam  eodem  sensu  subiicitur  a  Deo  fuisse  formatos  :  quod  ad  generalem  creationem  non  spectat,  sed  tantum  ad  ius  adoptionis  quo  facti  sunt  novum  Dei  opus  et  figmentum,  ut  alia  forma  illis  fuit  indita:  quo  sensu  etiam  vocatur  fictor  vel  opifex  eorum.  Et  alibi  quum  dicit  propheta  (Ps.  95,  6)  :  Cognoscite  quod  Iehova  ipse  fecit  nos,  et  non  ipsi  nos,  specialem