51:36  prise  et  se  veut  faire  valoir.  Apres  l'avarice,  quand  nous  appetons  le  bien  d'autruy,  et  toutes  choses  semblables  sont  aussi  bien  a  condamner.  Brief,  les  actes  exterieurs  nous  rendent  tesmoignage  que  nous  sommes  pleins  confection  devant  Dieu.  Et  ou  ce  trouvera-elle?  En  nos  desirs,  en  nos  conseils,  en  nos  pensees,  et  en  toutes  nos  entreprises,  on  void  qu'il  n'y  a  qu'une  source  de  tout  mal.  Ainsi  donc  que  nous  soyons  attirez  en  une  telle  cognoissance  de  nos  pechez  que  ce  soit  pour  nous  desplaire  du  tout  devant  Dieu.  Et  nous  voyons  qu'en  la  Loy  il  y  a  une  telle  facon  d'enseigner.  Dieu  en  sa  Loy  ne  defend  point  seulement  la  paillardise:  mais  il  defend  l'adultere,  voire  de  prime  face  il  ne  defend  point  les  fraudes,  les  rapines.  Quoy  donc?  Le  larecin.  Il  ne  defend  point  les  mensonges,  mais  seulement  le  faux  tesmoignage.  Or  il  semble  bien  a  ceux  qui  ne  cognoissent  point  la  vertu  de  la  Loy  qu'ils  se  soyent  bien  acquitez  de  leur  devoir  quand  ils  se  sont  bien  abstenus  de  ces  crimes-la.  Et  voila  pourquoy  aussi  S.  Paul  dit  que  pour  un  temps  il  a  pense  estre  du  tout  iuste,  et  que  Dieu  ne  luy  eust  sceu  rien  reprocher.  Et  voila  comme  les  hypocrites  s'enyvrent  en  leur  presomption,  et  la  dessus  deviennent  comme  phrenetiques  si  Dieu  les  redargue,  car  il  leur  semble  qu'il  leur  fait  grand  tort.  Et  pourquoy?  Ils  ne  comprennent  pas  quelle  est  la  nature  de  la  Loy.  Or  elle  est  spirituelle,  dit  sainct  Paul,  c'est  a  dire  qu'il  nous  faut  estre  du  tout  reformez  pour  nous  renger  a  icelle.  Et  cependant  que  nous  suyvons  nostre  nature  charnelle,  tout  ce  que  nous  penserons,  tout  ce  que  nous  pourrons  faire  et  dire  ne  sera  que  peche  devant  Dieu.  Ainsi  donc  il  ne  nous  faut  point  regarder  au  premier  mot  qui  est  mis  en  la  Loy,  mais  Dieu  nous  a  voulu  rendre  la  paillardise  plus  detestable  quand  il  a  mis  ceste  espece  d'adultere,  voila  une  chose  qui  est  pour  pervertir  tout  ordre  et  police  entre  les  hommes,  si  le  mariage  ne  demeure  entier  et  inviolable.  Dieu  donc  sous  ce  mot  d'Adultere  a  monstre  que  toute  paillardise  et  impudicite  luy  deplaist.  Apres  il  dit,  Tu  ne  tueras  point.  Et  est-il  donc  licite  de  battre?  Nenni,  non  pas  mesme  de  hair,  suivant  ce  que  dit  sainct  Iean,  que  celuy  qui  hait  son  prochain  en  secret,  encores  qu'il  ne  le  tormente  point,  qu'il  ne  le  touche  point  du  doigt,  il  est  meurtrier  devant  Dieu.  Ainsi  donc  sous  le  mot  de  Meurtre,  Dieu  condamme  tous  les  torts  que  nous  ferons  a  nos  prochains.  Combien  donc  que  nous  ne  remuyons  point  un  doigt  pour  leur  mal-faire,  si  nous  les  haissons,  que  nous  leur  portions  quelque  malvueillance,  nous  sommes  condamnez  de  meurtre  devant  Dieu.  Autant  en  est-il  du  larecin:  car  les  larrons  ne  sont  pas  seulement  ceux  qu'on  fouette,  et  ausquels  on  coupe  les  aureilles,  et  lesquels  on  pend:  ceux-la  (di-ie)  ne  sont  pas