45:36  domesticis,  unicum  esse  dominum.  Porro  quum  istam  Dei  gratiam,  de  qua  loquitur,  amplificat  ex  subito  motu  infantis,  quem  utero  gestabat,  non  dubium  est  quin  testari  velit,  se  aliquid  supernaturale  et  divinum  sensisse.  45.  Beata  quae  credidit.  Quando  ex  superiore  Lucae  testimonio  constat,  arcano  spiritus  impulsu  loquutam  esse  Elisabeth,  ille  spiritus  est,  qui  Mariam,  eo  quod  credidit,  beatam  esse  pronuntiat,  et  Mariae  fidem  laudando  generaliter  admonet,  ubi  sita  sit  vera  hominum  felicitas.  Felix  Maria,  quae  Dei  promissionem  corde  amplexa  sibi  totique  mundo  salutem  concepit  ac  peperit.  Hoc  illi  speciale:  sed  quia  nulla  nobis  iustitiae,  vitae,  aut  ullius  boni  gutta  suppetit,  nisi  quantum  verbo  suo  Dominus  offert,  una  est  fides  quae  ab  extrema  inopia  et  miseria  ereptos  verae  felicitatis  nos  facit  compotes.  Et  magnum  pondus  inest  huic  membro,  quia  complementum  erit  omnibus,  quae  dicta  sunt.  Sensus  enim  est,  fide  locum  dari  promissionibus  divinis,  ut  suum  in  nobis  effectum  obtineant.  Certum  quidem  est,  non  pendere  ex  hominum  arbitrio  Dei  veritatem,  quin  potius  verum  est  illud  (Rom.  3,  4),  Deum  perpetuo  veracem  manere,  quamvis  totus  mundus  (qui  incredulus  est  ac  mendax)  illius  fidem  labefactare  conetur:  sed  quia  indigni  sunt  increduli,  qui  promissionum  fructum  percipiant,  ideo  docet  scriptura,  fide  tantum  efficaces  esse  in  salutem  nostram.  Offert  enim  Deus  sua  beneficia  promiscue  omnibus,  fides  autem  sinum  ad  ea  recipienda  expandit:  incredulitas  autem  excidere  patitur,  ne  ad  nos  usque  perveniant.  Si  qua  fuisset  Mariae  incredulitas,  obstare  tamen  Deo  non  poterat,  quin  opus  suum  compleret  alio  quo  visum  esset  modo.  Sed  beata  dicitur,  quae  oblatam  sibi  benedictionem  fide  recipiens  Deo  viam  patefecit  ad  complendum  opus  suum,  sicuti  rursum  incredulitas  ianuam  illi  claudit  manumque  eius  ab  opere  arcet,  ne  salvificam  sentiant,  qui  ipsam  fraudant  virtutis  suae  laude.  Notanda  est  etiam  relatio  inter  verbum  et  fidem,  unde  colligimus,  quid  sit  credere:  nempe,  dum  loquenti  Deo  subscribimus,  certoque  statuimus,  quod  nobis  promittit  facturum  esse.  Particula  a  Domino  tantundem  valet  atque  Ex  parte  Dei,  ut  vulgo  barbari  loquuntur.  Promissio  enim  per  angelum  allata  fuerat,  sed  prodierat  a  solo  Deo.  Unde  colligimus,  sive  angelorum  sive  hominum  ministerio  utatur  Deus,  velle  tamen  non  minus  honoris  verbo  suo  deferri  quam  si  palam  ipse  e  coelo  descenderet.  LUC.  I.  46.  Et  ait  Maria:  Magnificat  anima  mea  Dominum,  47.  Et  exsultavit  spiritus  meus  in  Deo  servator  e  meo,  48.  Quia  respexit  ad  humilitatem  ancillae  suae:  ecce  enim  ex  hoc  tempore  beatam