42:36  les-  choses  seront  tournees  tout  au  contraire  de  l'opinion  des  hommes.  Voila  dequoy  cette  prophetie  devoit  servir  aux  fideles,  il  est  vray  qu'auiourd'huy  nous  n'avons  point  de  tesmoignage  certain  des  choses  qui  devoient  advenir,  nous  voions  les  troubles  qui  sont  grands  au  monde,  et  toutesfois  nous  ne  scavons  ou  le  coup  doit  tomber,  mais  puis  qu'ainsi  est  que  Dieu  ha  si  bien  proveu  a  son  Eglise  du  temps  passe,  attendonsnous  auiourd'huy  a  luy  aussi  bien,  et  sachons  qu'il  conduira  tellement  le  tout,  que  rien  ne  se  fera  qu'a  nostre  profit  et  avantage.  Voila  donc  ce  que  nous  avons  a  noter  de  cette  prophetie,  et  au  reste  notons  ce  que  l'ange  adiouste,  Qu'estant  retourne  en  son  pays,  qu'il  se  heurtera  contre  les  forteresses,  et  trebuschera,  et  ne  se  trouvera  plus,  car  quand  le  roy  Antiochus  fut  vaincu,  on  le  renvoia  outre  la  montagne  de  Taurus,  toute  l'Asie  mineur  luy  fut  ostee,  et  ce  luy  pouvoit  estre  un  terrible  regret,  car  il  ne  se  contentoit  point  de  ses  pays  la  qui  estoient  si  grands,  si  riches,  et  si  opulents,  mais  il  vouloit  encores  occuper  la  Grece,  et  pensoit  bien  avec  cela  qu'Egypte  seroit  sienne:  or  on  luy  couppe  une  aile  beaucoup  plus  grande  qu'on  n'avoit  point  au  roy  Philippes  de  Macedone  (car  aussi  il  estoit  beaucoup  plus  riche)  or  tout  est-il  fait,  il  faut  qu'il  se  contente  de  ce  qu'on  luy  donne,  et  s'en  retourne  tout  desconfit.  Or  se  voiant  ainsi  destitue  du  tout,  le  voila  pire  qu'enrage,  et  se  pensant  recouvrer  sur  quelque  chose,  il  va  piller  un  temple,  et  les  paisans  le  vont  tuer  comme  on  feroit  un  veau  a  la  boucherie.  Voila  donc  ce  que  Daniel  veut  signifier,  quand  il  dit  qu'Antiochus  retournera  en  son  pays,  et  ne  se  retrouvera  plus,  et  par  cela  nous  voions  comme  Dieu  abat  l'orgueil  des  mondains,  et  comme  il  se  mocque  des  folles  entreprinses  des  hommes,  quand  ii  change  en  un  moment  les  choses,  qu'on  eust  pense  qu'elles  eussent  dure  sans  fin,  il  ne  faut  que  tourner  la  main,  et  tout  s'en  va  en  ruine  et  confusion.  Ainsi  donc  quand  nous  connoissons  que  toutes  choses  sont  en  la  main  de  Dieu,  et  qu'il  en  dispose  a  sa  volonte,  ne  craignons  point,  encores  que  nous  voions  les  choses  confuses  au  monde,  sachons  que  Dieu  pourvoira  a  tout,  et  que  comme  il  nous  ha  advertis  par  ses  propheties  ici,  que  les  troubles  et  changemens  qui  adviennent  ici  bas,  ne  se  font  point  sans  qu'il  l'ait  ordonne,  que  nous  sachions  que  rien  ne  se  fera  qui  ne  nous  soit  profitable,  puis  qu'une  fois  il  nous  ha  receus  en  sa  sauvegarde,  et  que  sa  protection  est  sur  nous.  Suivant  cette  saincte  doctrine,  nous-nous  prosternerons  devant  la  face  de  nostre  bon  Dieu,  etc.