41:36  totius  monarchiae:  et  videbimus  postea  suo  loco,  Danielem  habitasse  una  cum  Cyro,  qui  regnavit  fere  usque  ad  triginta  annos.  Et  ita  longum  tempus  intercessit  inter  eius  mortem,  et  inter  mortem  Darii.  Hoc  igitur  non  accidit  absque  admirabili  Dei  consilio,  quod  mutatio  regnorum  non  concussit  statum  Danielis,  ut  saepe  fieri  solet.  Nova  enim  imperia,  quemadmodum  scimus,  sunt  instar  conversionis  mundi.  Sed  Daniel  stetit  semper  in  suo  gradu,  ut  spectabilis  esset  Dei  bonitas  in  ipso,  et  ut  quocunque  iret,  secum  ferret  aliquod  testimonium  gratiae  Dei.  Non  prosequar  ulterius,  quia  cras  aggrediemur  vaticinium.  CAPUT  VII.  1.  Anno  primo  Beltsazar  regis  Babylonis  Daniel  somnium  vidit,  et  visiones  capitis  eius  in  lecto  eius.  Tunc  somnium  scripsit,  summam  sermonum  exposuit.  2.  Loquutus  est  Daniel,  et  exposuit:  Vidi  in  visione  mea  per  noctem^  et  ecce  quatuor  venti  coelorum  pugnantes  (alii  vertunt,  exorientes)  in  mari  magno.  Hic  incipit  Daniel  doctrinam  ecclesiae  peculiarem  tradere.  Deus  enim  prius  illum  constituerat  interpretem,  ac  magistrum  profanis  regibus.  Nunc  autem  praeficit  ecclesiae  doctorem,  ut  intus  exerceat  munus  suum,  et  erudiat  filios  Dei  in  medio  ecclesiae  gremio.  Hoc  primo  loco  notandum  est:  quia  hactenus  longius  patebant  vaticinia,  quam  ad  domesticos  fidei:  hic  vero  restringitur  Danielis  officium  ad  ecclesiam.  Dicit  hanc  visionem  sibi  oblatam  fuisse  primo  anno  regis  Beltsazar,  antequam  accideret  illa  mutatio,  de  qua  vidimus.  Sed  primo  loco  tenendum  est  spiritus  sancti  consilium:  hoc  est,  in  quem  finem  et  usum  patefecerit  Danieli  quae  hoc  capite  videbimus.  Prophetae  omnes  spem  dederant  liberationis  electo  populo,  postquam  Deus  poenas  de  illius  ingratitudine  et  contumacia  sumpsisset.  Si  quis  legat  quae  alii  prophetae  de  futura  redemptione  denuntiant,  putaret  felicem  et  modis  omnibus  laetum,  et  quietum  promitti  statum  ecclesiae,  postquam  ab  exsilio  reversus  esset  populus.  Atqui  longe  aliter  accidit,  ut  testantur  historiae.  Poterant  igitur  labascere  fideles,  et  tandem  animis  deficere,  nisi  de  variis  perturbationibus,  quae  tunc  instabant,  admoniti  fuissent.  Haec  igitur  prima  ratio  fuit,  cur  Deus  prophetae  suo  ostenderit  quae  postea  videbimus:  nempe  tres  adhuc  monarchias  restare,  quarum  alia  priori  succederet:  quo  interea  starent  fideles,  et  permanerent  constanter  in  fide  promissio-