37:36  periculo  prostravit.  Simul  revocat  in  memoriam  non  esse  hoc  hominis  virtuti  sed  Dei  auxilio  tribuendum:  quia  tanta  vincendi  facilitas  humanitus  non  contigit.  3.  (Persequutus  est  eos.)  Iterum  exornat  in  victoriae  magnitudine  singulare  Dei  beneficium.  Hoc  enim  plurimum  habet  momenti,  quod  eam  obtinuit  in  regione  sibi  ignota.  Difficile  enim  et  periculosum  est  persequi  hostes  in  regionibus  ignotis:  et  quantum  valeat  locorum  notitia,  satis  ostendunt  historiae:  idque  in  dies  experiuntur  qui  bellum  gerunt.  Id  nihil  obfuit  Abrahamo:  unde  magis  perspicuum  est,  ipsum  Dei  manu  ductum  atque  adiutum  fuisse,  ut  intrepide  suos  circumduceret.  4.  (Quis  designavit.)  Tametsi  hic  Abrahae  exemplum  duntaxat  proposuit  Isaias,  tamen  dubium  non  est,  quin  populum  commonefacere  voluerit  de  omnibus  beneficiis  quae  patres  olim  acceperant:  perinde  ac  si  diceret:  Revocate  in  memoriam  quae  sit  vestra  origo:  unde  excitarim  patrem  vestrum  Abrahamum:  quo  ipsum  duxerim:  neque  tamen  haec  beneficiorum  meorum  clausula  fuit:  nunquam  enim  ab  eo  tempore  desii  vos  omni  genere  bonorum  cumulare.  Quum  ergo  interrogat  quisnam  sit,  non  de  uno  tantum  facinore  loquitur:  sed  adiungit  alia  beneficia,  quae  variis  temporibus  sequuta  sunt  quorum  etiam  populus  debuit  reminisci.  Quod  Deum  ab  initio  generatioies  vocasse  dicit,  referri  debet  ad  continuos  aetatum  successus,  "in  Hebraeis  significat  non  modo  saeculum,  vel  durationem  humanae  vitae,  sed  eiusdem  temporis  homines.  Ita  generatio  una  ab  altera  distinguitur,  ut  patres  a  filiis,  et  ab  avis  nepotes.  Nam  posteri  nos  proximam  generationem  vocabunt:  maiores  vero  nostros  magis  remotam  ac  vetustam.  Poijro  quia  unumquodque  saeculum  absumeret  humanum  genus  nisi  sobole  renovaretur,  docet  propheta  continuo  tenore  propagari  homines  a  Deo,  ut  alii  aliis  succedant.  Unde  sequitur  omnibus  saeculis  praeesse,  ne  putemus  fortuito  gubernari  hunc  mundum,  ubi  in  aetatum  serie  clare  perspicitur  Dei  providentia.  Iam  vero  quia  propter  diversas  mutationes  caeco  impetu  volutari  mundus  videtur,  his  verbis  admonet  propheta  multiplices  istos  eventus  a  mundi  exordio  fuisse  cognitos.  Summa  est,  in  varietate  ista  quam  affert  tempus,  Deum  regnare,  et  aequabili  tenore  perficere  quod  ab  initio  decrevit.  (Ego  Iehova.)  Tandem  horum  beneficiorum  autorem  se  esse  clarius  affirmat:  quod  Abraham  vicit  hostes,  quod  sine  noxa  inter  impios  versatus  est,  quod  fudit  reges,  quod  eum  ultus  est  Dominus,  quum  Abimelech,  atque  etiam  Pharao  uxorem  eius  rapuisset:  praeterea  quod  singulis  generationibus  alia  quoque  varia  beneficia  data  sint,  hoc  sibi  acceptum  ferendum  docet.  Nec  enim  generi  Abrahae  solum,  sed  universo  mundo  virtus  ipsius  innotuerat.