35:36  eussent.  Comment?  Il  faut  bien  qu'il  y  ait  ici  une  vertu  celeste  quand  on  voit  les  hommes  et  les  femmes  ainsi  changer.  Mais  tout  cela  (comme  i'ay  dit)  s'est  fait  selon  l'artifice  de  Satan,  lequel  par  une  feintise  a  contrefait  les  oeuvres  de  Dieu,  et  s'est  transfigure  ainsi  afin  qu'on  ne  discernast  point,  mais  qu'on  cuidast  que  ce  qui  est  d'enfer,  estoit  procede  du  ciel.  Tant  y  a  que  nous  voyons  bien  qu'il  ne  faut  plus  trouver  estrange  qu'Eliu  ait  eu  une  telle  vehemence  en  son  esprit:  d'autant  que  Dieu  l'avoit  institue,  voiie,  et  l'avoit  institue  afin  qu'il  entreprint  un  combat  contre  Iob  et  contre  ses  amis.  Et  mesmes  il  falloit  que  Dieu  besongnast  d'une  facon  nouvelle  envers  cest  homme.  Et  pourquoy?  La  ieunesse  de  soy  ne  sera  point  escoutee  entre  les  anciens  :  comme  les  vieilles  gens  se  prisent  en  leur  aage,  et  leur  semble  qu'ils  ont  peu  acquerir  vertu,  qu'ils  sont  sages:  et  cela  les  rend  plus  arrogans,  et  ils  sont  la  preoccupez  d'une  folle  opinion,  tellement  qu'ils  ne  se  peuvent  rendre  dociles  qu'avec  une  grande  difficulte,  et  comme  par  force.  Ainsi  donc  il  falloit  bien  que  Dieu  touchast  Eliu  au  vif,  et  qu'il  y  eust  un  grand  changement  d'esprit  en  luy,  afin  que  sa  doctrine  fust  mieux  receue  entre  les  anciens,  et  qu'elle  eust  quelque  entree.  En  somme  Dieu  a  voulu  ici  rendre  Eliu  authentique,  quand  il  luy  a  donne  une  telle  vehemence  d'esprit.  Mais  il  y  a  aussi  la  raison  que  nous  avons  touchee,  c'est  qu'il  voyoit  la  verite  estre  opprimee:  veu  que  Iob  a  mal  maintenu  sa  querelle,  combien  qu'elle  fust  bonne:  que  les  autres  aussi  ont  desguise  les  choses,  et  qu'ils  faisoyent  un  mauvais  fondement,  et  ont  prophane  la  parole  qui  estoit  de  Dieu,  d'autant  qu'ils  ont  amene  des  raisons  bonnes  et  sainctes  pour  approuver  un  mauvais  fondement  qu'ils  avoyent  prins.  Voyant  cela  donc,  il  a  este  esmeu  d'un  zele  qu'il  a  conceu  en  soy:  son  esprit  a  este  comme  bouillant:  et  cela  l'eust  fait  fendre,  sinon  qu'il  se  fust  descharge.  Or  cecy  nous  doit  servir  a  double  usage.  Car  en  premier  lieu,  puis  que  nous  voyons  que  Dieu  a  imprime  une  telle  marque  en  la  doctrine  d'Eliu,  et  que  l'Esprit  celeste  est  apparu  en  sa  bouche,  tant  plus  devons  nous  estre  incitez  a  recevoir  ce  qu'il  dit.  Car  pourquoy  est-ce  que  Dieu  l'a  ainsi  marquee,  sinon  afin  qu'elle  ait  plus  de  reverence  envers  nous?  Ainsi  donc  ce  qu'Eliu  deduira  ci  apres  recevonsle,  non  point  comme  d'un  homme  mortel,  veu  que  Dieu  y  a  adiouste  son  seau,  et  qu'il  a  voulu  que  la  doctrine  nous  fust  rendue  plus  certaine.  Que  donc  nous  apprenions  par  cela  de  nous  y  assuiettir,  sachans  que  nostre  foy  ne  sera  point  fondee  sur  la  doctrine  d'une  creature,  d'autant  que  c'est  Dieu  qui  parle  par  la  bouche  d'un  homme,  et  s'en  sert  comme  d'un  instrument.  Voila  ce  que  nous  avons  a  observer.  Mais  il  nous  faut  passer  plus  outre.