28:36  quant  au  boire  et  au  manger:  c'est  que  les  hommes  se  contentent  tellement  de  ce  qu'ils  ont,  qu'estans  nourris  ils  puissent  recognoistre:  Voici  nostre  Dieu  qui  a  regarde  a  nostre  pasture,  et  nous  le  pouvons  bien  contempler  pere  envers  nous,  quand  il  monstre  une  telle  solicitude  qu'il  a  de  nostre  vie.  Que  donc  les  hommes  advisent  de  n'estre  point  enyvrez  en  leurs  delices,  et  en  telle  variete  que  leurs  sens  soyent  la  abrutis:  mais  que  tousiours  ils  tendent  a  Dieu.  Or  le  semblable  doit  estre  aussi  bien  en  nostre  vesture.  Il  est  dit:  Qu'on  ne  sera  point  vestu  de  nulles  diversitez  (en  somme).  Cela  est  pour  monstrer,  que  nous  devons  tenir  le  plus  qu'il  est  possible  toute  sobriete  aussi  bien  en  nos  vestemens  qu'au  boire  et  au  manger.  Car  si  les  hommes  sont  accoustrez  ainsi  de  diverses  parures,  et  qu'il  y  ait  beaucoup  de  finferluches  et  desguisemens  en  leur  faict,  dont  procede  cela?  Il  est  certain  que  nature  ne  l'enseigne  point.  Car  les  Payens  ont  bien  seu  dire,  que  si  chacun  suyvoit  son  naturel,  nous  n'aurions  que  faire  de  tant  de  services,  ni  d'appareils.  Les  hommes  se  tourmentent  d'eux-mesmes.  Voila  que  c'est  de  nos  cupiditez.  Car  elles  nous  travaillent  a  mettre  peine  a  ceci  et  a  cela:  et  puis  nous  donnons  peine  aux  autres:  voila  tout  le  monde  en  inquietude.  Et  pourquoy?  Si  nous  estions  contens,  il  nous  seroit  beaucoup  plus  aise  de  vivre:  mais  ce  que  nous  sommes  tant  superflus  est  cause  qu'il  n'y  a  nulle  fin  a  nos  travaux:  nous  sommes  comme  des  ames  damnees.  Et  a  qui  en  est  la  coulpe  sinon  a  nous?  Et  ainsi  notons  (comme  i'ay  desia  touche)  que  toutes  les  varietez  qu'on  appettera,  sont  autant  de  tesmoignages  que  nous  ne  pouvons  nous  retenir  en  vray  contentement  de  nature.  Il  est  vray,  que  de  tenir  ceste  rigueur  et  austerite  si  extreme  qu'ont  eu  des  phantastiques,  qu'il  nous  faut  contenter  de  nature,  qu'il  ne  nous  est  point  licite  d'avoir  ne  verre  ne  gobelet,  qu'il  faut  boire  a  sa  main:  ce  sont  des  sottises.  Mais  quand  nostre  Seigneur  se  monstre  liberal  envers  nous,  regardons  la.  Il  est  dit  au  Pseau.  104.  que  non  seulement  Dieu  a  donne  aux  hommes  du  pain  et  de  Peau  pour  la  necessite  de  leur  vie:  mais  qu'il  adiouste  aussi  bien  le  vin  pour  conforter,  et  pour  resiouir.  Quand  nous  voyons  que  Dieu  de  superabondant  nous  donne  outre  la  necessite  precise  plus  qu'il  ne  nous  faut:  et  bien,  iouyssons  de  sa  bonte,  et  cognoissons  qu'il  nous  permet  d'en  user  en  bonne  conscience  avec  action  de  graces.  Il  feroit  bien  venir  le  bled  pour  nostre  nourriture,  sans  que  la  fleur  precedast:  il  feroit  bien  aussi  croistre  le  fruict  sur  les  arbres  sans  fueille  ne  fleur.  Et  nous  voyons  que  nostre  Seigneur  nous  veut  resiouir  en  tous  nos  sens,  et  nous  a  voulu  presenter  ses  benedictions  en  toutes  sortes,  et  en  toutes  les  creatures  qu'il  nous  offre  pour  en  iouir.  Ainsi,  il  n'est  point