24:36  missum.  Itaque  nihil  mirum  si  aeternus  Dei  sermo,  unius  cum  patre  deitatis  et  essentiae,  nomen  angeli  mutuatus  sit  futurae  legationis  respectu.  De  visione,  magna  est  opinionum  varietas.  Nimis  violenti  sunt  allegoristae,  qui  ex  rubo  faciunt  corpus  Christi,  quod  coelestis  maiestas  non  consumpsit,  quum  sibi  elegit  pro  domicilio.  Coacte  etiam  alii  hoc  torquent  ad  praefractum  gentis  ingenium,  quod  similes  fuerint  Israelitae  spinis,  quae  igni  non  cedunt.  Verum  ubi  germanus  sensus  in  medium  prolatus  fuerit,  alienos  refellere  non  erit  necessarium.  Conveniunt  autem  optime  haec  visio  et  altera  prior  quae  oblata  fuerat  Abrahae  (Gen.  15,  17).  Vidit  ille  lampadem  fulgentem  in  medio  fornacis  caliginosae.  Ratio  exprimitur,  quod  Deus  populum  suum  in  tenebris  exstingui  non  sinet.  Eadem  analogia  respondet  rubo  suam  integritatem  retinenti  in  media  flamma.  Rubi  species  erat  in  humili  et  contempto  populo.  Igni  non  absimilis  erat  tyrannica  oppressio,  quae  consumptionem  secum  traxisset,  nisi  mirabiliter  obstitisset  Deus.  Itaque  Dei  praesentia  rubetum  ab  incendio  incolume  evasit,  sicuti  in  Psalmo  46,  4  dicitur,  quamvis  ecclesiam  impetant  turbulenti  fluctus,  qui  naufragium  minantur,  ipsam  tamen  non  moveri:  quia  Deus  in  medio  eius  habitat.  Sic  apte  repraesentata  fuit  populi  immaniter  afflicti  imago,  qui  totus  igne  correptus  ardorem  quidem  sentiebat,  sed  absque  clade:  quia  praesenti  Dei  auxilio  custodiebatur.  3.  Dixit  itaque  Moses:  Divertam,  Certum  est  religione  tactum  fuisse  Mosis  animum,  non  temere,  sed  divino  instinctu.  Quanquam  nondum  visionibus  assueverat,  agnoscit  tamen  non  inane  esse  spectrum,  sed  mysterium  aliquod  notari  spectaculo  illo,  cuius  cognitio  minime  sibi  esset  negligenda,  ad  quam  divinitus  vocabatur.  In  quo  etiam  notanda  est  eius  docilitas,  ubi  propius  accedit  ad  discendum.  Saepe  enim  accidit  ut  frustra  Deus  nobis  occurrat,  quia  tantam  gratiam  maligne  respuimus.  Ideo  discamus  Mosis  exemplo,  quoties  signo  aliquo  nos  ad  se  Deus  invitat,  sedulo  attendere,  ne  socordia  nostra  lux  oblata  suffocetur.  Quum  vero  magnam  visionem  appellat,  inde  colligimus,  arcana  inspiratione  fuisse  edoctum  de  altitudine  mysterii  quod  nondum  innotuerat.  Sed  Deus  hoc  modo  eius  animum  ad  reverentiam  paravit,  quo  celerius  proficeret.  4.  Vocavitque  eum  Deus  e  medio  rubi.  Primo  loco  observent  lectores  quod  omnibus  fere  visionibus  commune  est,  non  fuisse  mutum  spectaculum  sancto  viro  territando,  sed  additam  fuisse  simul  doctrinam  quae  eius  mentem  colligeret.  Nulla  enim  signorum  esset  utilitas,  si  suspensos  tenerent  eorum  a  quibus  cernuntur  sensus.  Caeterum  quamvis  servum  suum  obstupefacere  nolit  Deus,  reverentiam  tamen  futuro  suo  sermoni  et  autoritatem  conciliat  duobus  modis:  quia  Mosen  bis  nomine  compellans,  in  eius  animum