19:36  3560,  CALVINUS  WOLPHIO.  Nonnulla  de  adversa  valetudine  praefatus  Blandratam  et  Lismaninum  notat.  (Exemplar  authenticum  exstat  in  Bibi.  civ.  Turic.  F.  38,  olim  Epp.  Tom.  III.  25  cum  subscriptione  autographa.  Reperies  etiam  in  Cod.  Gen.  107a,  fol.  84  v.  et  ap.  Simlerum  Yol.  102.)  Eximiae  pietatis  et  doctrinae  viro  D.  Ioanni  Wolphio  fideli  Christi  ministro  in  ecclesia  Tigurina  fratri  et  symmystae  colendo  et  carissimo.  Utinam  frequentiore  literarum  usu  mihi  liberum  esset  meam  erga  te  benevolentiam  testari,  integerrime  frater.  Sed  quia  non  ignotae  sunt  tibi  occupationes  meae,  pro  tua  aequitate  mihi  condona  si  cesso  in  hoc  vulgari  genere  officii:  praesertim  quum  tibi  commune  sit  quidquid  scribo  D.  Bullingero.  Nunc  decumbo  ex  dolore  pedis  dextri  qui  me  acerrime  toto  biduo  cruciavit.  Tandem  ita  mitigatus  est,  ut  adhuc  lecto  affixum  teneat.  Spes  tamen  bona  est  plenae  sanationis.  Si  Deo  visum  fuerit  aliis  morbis  podagram  adiicere,  patienter  ferenda  erit  paterna  eius  castigatio.  Heri  quum  Bezae  scriberem  mandato  tuo  sum  defunctus.1)  Quod  ad  Blandratam  spectat  incredibile  est  quam  perfidiosus  sit  pravique  ingenii.2)  Per  eum  non  stetit  quominus  in  exitiales  laqueos  me  coniiceret.  Quocunque  veniat  summus  erit  adulator  ad  captandam  gratiam:  sed  in  absentes  virulentiam  evomet,  quae  apud  homines  stulte  credulos  valde  esset  noxia.  Quam  pertinax  sit  haereticus  forte  aliquando  ex  D.  Martyre  audisti.3)  Quibus  dissidiis  Italicam  ecclesiam  quae  apud  nos  est  labefactare  molitus  sit  omnes  norunt.  Volunt  tamen  Poloni  solo  nutu  sepelire  omnia.  Ac  graeculus4)  noster  praesertim  ad  suam  levitatem  libenter  huc  et  illuc  nos  inflecteret.  Non  satis  quod  inconsiderate  lupum  ovibus  praefecit  ac  ornavit  superbo  perinde  ut  inani  archipresbyteri  titulo5)  nisi  ab  omni  nota  ignominiae  scelestum  et  pestiferum  hominem  vindicet.  Sed  ubi  propius  cognitus  fuerit,  sponte,  ut  arbitror,  eos  omnes  qui  nunc  suscipiunt  eius  causam,  nimiae  facilitatis  poenitebit.  Vale,  eximie  vir  et  frater  ex  animo  colende.  Dominus  semper  tibi  adsit,  te  gubernet,  incolumem  tueatur.  Genevae  vij.  Idus  Octobris  1561.  Ioannes  Calvinus  tuus.  3560.1)  in  N.  3555  nihil  ad  rem.  2)  Vide  epp.  sequentes.  3)  cf.  N.  3042.  Schmidt,  Verm.  230.  4)  Lismaninus.  5)  cf.  N.  3245.