54:359  359  SERMON  XXX  360  fort  subtil  et  scavant,  encores  eust-on  dit  qu'il  y  avoit  partie  egale.  Mais  il  a  pleu  a  Dieu  d'exercer  ainsi  sainct  Paul.  Et  par  cela  nous  voyons  que  quelques  fois  il  nous  faudra  bien  soustenir  des  combats  contre  des  gens  de  nulle  valeur,  qui  ne  meritent  point  qu'on  ouvre  la  bouche  pour  repliquer  contre  leur  babil:  ce  sont  des  chiens  qui  abbayent  pour  tout  potage:  si  faudra-il  que  les  serviteurs  de  Dieu  vienent  ici  en  combat.  Or  s'ils  pensent  que  cela  derogue  a  leur  reputation,  il  faut  venir  a  ce  poinct,  c'est  que  quand  nous  servons  a  Dieu,  combien  qu'il  semble  que  nostre  labeur  soit  frivole  et  inutile,  qu'il  nous  doit  bien  suffire  que  Dieu  nous  approuve.  Quand  donc  nous  aurons  affaire  a  gens  de  nul  scavoir  et  de  nul  esprit,  si  faut-il  neantmoins  que  nous  tenions  bon  en  combatant  pour  la  verite,  et  qu'il  ne  nous  chaille  de  ce  que  le  monde  pensera,  ou  de  ce  qu'on  pourra  dire:  car  il  nous  faut  plustost  regarder  a  Dieu  qui  nous  veut  exercer  par  tel  moyen.  Et  de  fait,  nous  voyons  qu'il  a  bien  falu  que  le  Prophete  Ezechiel  combatist  contre  des  femmes,  des  sorcieres  qui  contrefaisoyent  des  prophetesses  de  son  temps,  il  a  falu  qu'il  s'adressast  a  telles  personnes.  Il  est  vray  que  cela  n'est  point  convenable  selon  le  sens  commun  a  la  dignite  d'un  Prophete:  mais  il  a  conclu  qu'il  faloit,  puis  que  le  diable  regnoit  en  ces  femmes-la,  qu'il  prinst  la  querelle  de  la  verite  de  Dieu,  contre  les  mensonges  et  les  abus  de  Satan.  Ainsi  donc  nous  en  faut-il  faire.  Car  ce  n'est  point  a  nous  de  choisir  les  parties  afin  de  nous  monstrer  et  d'avoir  plus  grand  lustre  quand  nous  aurons  abbatu  quelque  homme  de  grand  credit  et  renom  :  ce  n'est  pas  a  nous  de  choisir  cela.  Contentons-nous  que  nostre  Seigneur  nous  mette  en  la  lice,  et  que  la  il  nous  esprouve:  et  que  quand  nous  aurons  tasche  de  le  servir,  que  nous  scachions  que  ce  que  nous  aurons  fait  luy  est  agreable,  combien  que  le  monde  en  iuge  a  l'opposite.  Voila  pour  un  item,  que  nous  ne  devons  point  avoir  honte,  si  quelques  fois  il  nous  faut  batailler  contre  des  gens  malostrus,  qu'on  appelle.  Cependant  nous  avons  aussi  a  noter  qu'il  n'y  a  audace  qu'aux  plus  ignorans.  Car  un  homme  d'esprit  et  de  scavoir,  encores  qu'il  soit  malin,  aura  en  soy  plus  de  modestie  que  celuy  qui  n'aura  iamais  rien  cognu:  car  la  il  n'y  a  nulle  honte.  Ce  forgeron  donc  dont  il  est  ici  parle,  nous  est  comme  un  miroir  d'impudence  telle  qu'on  la  voit  en  ces  vileins  qui  ne  scavent  que  c'est  de  nulle  honnestete,  ils  ne  feront  nul  scrupule  de  s'elever  contre  Dieu  et  les  hommes,  ce  leur  est  tout  un,  on  ne  gagne  rien  a  leur  amener  nulle  raison,  car  ils  font  des  sourds,  ne  les  pourra-on  faire  rougir  en  facon  que  ce  soit.  Que  ceux  donc  qui  s'elevent  contre  les  serviteurs  de  Dieu  ne  se  prisent  pas  pour  dire  qu'ils